परिस्थितीचे गाऱ्हाणे करण्यापेक्षा परिस्थितीला सामोरे जाऊन यश मिळवा -दादाभाऊ कळमकर

अहमदनगर जिल्हा मराठा समाज सेवा मंडळाच्या वतीने गुणवंत विद्यार्थ्यांचा गौरव

अहमदनगर (प्रतिनिधी)- शिक्षण अत्यंत महाग झाले आहे. ज्या क्षेत्रात करिअर करायचे त्याच क्षेत्राचे शिक्षण विचारपूर्वक घेऊन विद्यार्थ्यांनी भविष्याची वाटचाल करावी. तंत्रज्ञानाच्या युगात विद्यार्थ्यांना चांगल्या संधी निर्माण झाल्या आहेत. परिस्थितीचे गाऱ्हाणे करण्यापेक्षा परिस्थितीला सामोरे जाऊन यश मिळवावे. गरजू गुणवंत विद्यार्थ्यांच्या मागे संस्था खंबीरपणे उभी राहणार असल्याचे प्रतिपादन अहमदनगर जिल्हा मराठा समाज सेवा मंडळाचे अध्यक्ष दादाभाऊ कळमकर यांनी केले.

अहमदनगर जिल्हा मराठा समाज सेवा मंडळाच्या वतीने इयत्ता दहावी बोर्डाच्या परीक्षेत 95 टक्कयांपेक्षा अधिक गुण मिळवणाऱ्या शहरातील गुणवंत विद्यार्थ्यांचा गौरव करण्यात आला. या गुणगौरव सोहळ्याच्या अध्यक्षीय भाषणात कळमकर बोलत होते. याप्रसंगी संस्थेचे सचिव अनिल शिंदे, उपाध्यक्ष हरिदास डोके, खजिनदार विनायक गरड, संचालक शरद ठाणगे, जयंत वाघ आदी उपस्थित होते.

प्रारंभी राजमाता जिजाऊ व छत्रपती शिवाजी महाराज यांच्या पुतळ्यास तर छत्रपती संभाजी महाराज यांच्या प्रतिमेस पुष्पहार अर्पण करुन कार्यक्रमाचे प्रारंभ करण्यात आले. प्रास्ताविकात हरिदास डोके यांनी संस्थेची अर्धशतकाकडे वाटचाल सुरू असून, समाजाला दिशा व आधार देण्याच्या उद्देशाने या सेवा मंडळाची स्थापना करण्यात आली आहे. सर्व क्षेत्रातील व्यक्ती समाजासाठी संस्थेच्या माध्यमातून योगदान देत आहे. समाजासाठी विविध योजना राबवण्याचे नियोजन असून, टप्प्याटप्प्याने कार्य करण्यात येत असल्याचे त्यांनी स्पष्ट केले.

अनिल शिंदे म्हणाले की, संस्थेच्या माध्यमातून विद्यार्थ्यांना प्रोत्साहन देण्याचे कार्य सुरू आहे. ग्रामीण भागातून शहरात येणाऱ्या समाजातील मुला-मुलींसाठी वस्तीगृह उभारण्याचा मानस आहे. त्या दिशेने नियोजन सुरु असल्याचे त्यांनी सांगितले. तर पुढील वर्षी भव्य स्वरुपाचा गुणवंतांचा गौरव सोहळ्याचे आयोजन केले जाणार असल्याचे त्यांनी जाहीर केले.

अभिषेक कळमकर म्हणाले की, इयत्ता दहावी हा शैक्षणिक जीवनातील पहिला महत्त्वाचा टप्पा आहे. विद्यार्थ्यांना करिअर साठी 58 प्रकारच्या शाखा उपलब्ध झाल्या आहेत. विद्यार्थ्यांनी शैक्षणिक जीवनात आपली दिशा भरकटू देऊ नये, चुकीचा सल्ला देणारे अनेक भेटतात. त्याग व कष्टाशिवाय यश नाही. करिअरसाठी दीड ते दोन वर्ष कष्ट घ्यावेच लागणार आहे. स्वतःमधील कौशल्य व आवड पाहून त्या क्षेत्रात करिअर करण्याचे त्यांनी आवाहन केले.

संस्थेचे उपाध्यक्ष बाबासाहेब गिरवले, सहसचिव बाळकृष्ण काळे, संचालक आसाराम कावरे व रमाकांत गाडे यांनी गुणवंत विद्यार्थ्यांना शुभेच्छा दिल्या. आरक्षण नसल्याने मराठा समाजातील विद्यार्थ्यांना अनेक अडचणीचा सामना करावा लागत आहे. कौशल्य व गुणवत्ता असून देखील विद्यार्थी आरक्षण नसल्याने मागे पडत असल्याची खंत पालकांनी व्यक्त केली.
या गुणगौरव सोहळ्यात दीक्षा वाळुंज प्रतिभा म्हस्के, गौरी तिकोणे, साई औताडे, शुभम रोहोकले, तनुजा कोंडे, जाई भागवत, शितल काळे, प्रांजल ठोंबरे, सार्थक भवार, पार्थ नरवडे, अवनी शिंदे, गौरी लांडगे, श्रुती उकिर्डे, श्रुतिका गुंजाळ, अनुजा कदम या गुणवंत विद्यार्थ्यांना प्रमाणपत्र व आर्थिक बक्षिसाच्या धनादेशाने सन्मानित करण्यात आले. कार्यक्रमाचे सूत्रसंचालन विनायक गरड यांनी केले. आभार जयंत वाघ यांनी मानले.