नाशिक मध्ये माजी समाजकल्याण मंत्री यांच्या हस्ते होणार गौरव
अहमदनगर (प्रतिनिधी)- येथील सामाजिक कार्यकर्ते पै. नाना डोंगरे यांना नाशिक येथील भावना बहुउद्देशीय संस्थेच्या वतीने आदर्श ग्रामपंचायत सदस्य पुरस्कार जाहीर करण्यात आला आहे. संस्थेचे अध्यक्ष राहुल मोरे यांनी पुरस्काराची घोषणा केली.
नाशिक, टिळकरोड येथील औरंगाबादकर हॉलमध्ये 22 डिसेंबर रोजी या पुरस्काराचे वितरण होणार आहे. या कार्यक्रमासाठी माजी समाजकल्याण मंत्री बबनराव घोलप, माजी शिक्षक आमदार नानासाहेब बोरस्ते आदी मान्यवरांच्या उपस्थितीमध्ये पुरस्कार वितरण करण्यात येणार आहे.
निमगाव वाघा (ता. नगर) येथील सामाजिक कार्यकर्ते तथा ग्रामपंचायत सदस्य पै. नाना डोंगरे यांचे सामाजिक, शैक्षणिक, क्रीडा व धार्मिक क्षेत्रात उल्लेखनीय कार्य सुरु आहे. ग्रामपंचायतच्या माध्यमातून अनेक समाजोपयोगी उपक्रम घेऊन निस्वार्थ भावनेन तेे योगदान देत आहे. गावात वाचनालय चालवून युवकांना स्पर्धा परीक्षेसाठी प्रोत्साहन देण्याचे त्यांचे कार्य सुरु असून, पर्यावरण संवर्धन व गावात मोठ्या प्रमाणात वृक्षरोपण व संवर्धनाची चळवळ त्यांनी चालवली आहे. कोरोना काळात बंद झालेली बस सेवा त्यांनी पाठपुरावा करुन ग्रामस्थांसाठी सुरु करुन दिली.
तसेच ग्रामपंचायतच्या माध्यमातून विविध प्रश्‍न सोडविण्याचे व नागरी सुविधा निर्माण करुन देण्याचे त्यांचे कार्य सुरु आहे. गावातील अनेक महत्त्वांच्या रस्ते होण्यासाठी त्यांनी प्रयत्न करुन सदर कामे मार्गी लावली. विकासात्मक कार्यासाठी त्यांचा सातत्याने पाठपुरावा सुरु आहे. ग्रामपंचायतमध्ये केलेल्या कार्याची दखल घेऊन त्यांना हा पुरस्कार जाहीर करण्यात आला असल्याची माहिती संस्थेचे सचिव महेश मुळे यांनी दिली. पुरस्कार जाहीर झाल्याबद्दल त्यांचे सर्वत्र अभिनंदन सुरु आहे.