आई-वडिलांच्या त्यागाच्या आठवणीने युवक भावूक
युवा एकसाथ फाउंडेशनच्या वतीने गरजू दिव्यांगांना व्हीलचेअर वाटप, रक्तदानात युवकांचा उत्स्फूर्त सहभाग
नगर (प्रतिनिधी)- युवक-युवतींना दिशा देण्यासाठी व त्यांच्यात संस्कार रुजविण्यासाठी शहरातील युवा एकसाथ फाउंडेशनच्या वतीने आयोजित करण्यात आलेल्या बाप समजून घेताना! या निशुल्क व्याख्यानास युवक-युवतींचा उत्स्फूर्त प्रतिसाद लाभला. व्याख्याते वसंत हंकारे यांनी युवक-युवतींमध्ये आई-वडिलांविषयी कृतज्ञाची जाणीव करुन दिली. तर बाप समजून घेताना या विषयावर तरुणाईचे प्रबोधन केले. जीवनात आई-बापाचा त्यागाचे स्मरण करुन देताना उपस्थित युवक-युवतींना अक्षरश: अश्रू ढाळल्या.
तसेच या कार्यक्रमात गरजू दिव्यांगांचे जीवन सुसह्य करण्यासाठी फाऊंडेशनच्या वतीने व्हीलचेअरचे वाटप करण्यात आले. तर रक्तदान शिबिरात युवकांनी उत्स्फूर्त सहभाग नोंदवून रक्तदान केले. सावेडी येथील संजोग लॉन्स मध्ये झालेल्या कार्यक्रमासाठी प्रमुख पाहुणे म्हणून आमदार संग्राम जगताप, अप्पर पोलीस अधीक्षक प्रशांत खैरे, उद्योजक प्रदीप पंजाबी, युवा उद्योजक गौरव कऱ्हाडे उपस्थित होते.
या कार्यक्रमाचे संयोजक तथा फाऊंडेशनचे संस्थापक अध्यक्ष रोहित काळोखे यांनी संस्थेच्या माध्यमातून गरीब विद्यार्थ्यांना शिक्षणासाठी दत्तक घेण्याचे काम सुरु आहे. गरजू दिव्यांगांना सातत्याने आधार दिला जात आहे. सध्याची तरुणाईची करियर घडविण्याच्या वयात दिशा भरकटत आहे. आई-वडिलांची काळजी न करता प्रेमापोटी मुले-मुली पळून जावून स्वत:चे आयुष्य उध्वस्त करत आहे. त्यांचे प्रबोधन करण्याच्या उद्देशाने या कार्यक्रमाचे आयोजन करण्यात आले असल्याचे त्यांनी स्पष्ट केले. उपाध्यक्ष संदेश कानडे व खजिनदार महेश साठे यांनी पाहुण्यांचे स्वागत केले.
व्याख्यानात वसंत हंकारे यांनी मुलांसाठी आई-बापाचे त्याग व परिश्रम सांगताना सर्वांना गहिवरून टाकले. ते म्हणाले की, मुलांनो आई बाबांवर प्रेम करा, त्यांचा विश्‍वास संपादन करा, त्यांची मान खाली जाणार नाही याची काळजी घ्या. आईबाप हेच खरे मंदिर आहे त्यांची सेवा करण्याचे त्यांनी आवाहन केले. तर समाजात डॉक्टर, वकील, इंजिनिअर, वैज्ञानिक घडले नाही तरी चालेल, मात्र चारित्र्यवान माणूस घडला पाहिजे, असे त्यांनी सांगितले. हंकारे यांनी श्रोत्यांना व्याख्यानातून अक्षरशः खिळवून ठेवले. नवीन पिढीला आई आणि बापाची खरी ओळख सांगताना सर्व सभागृह भावूक झाले होते. तर पालकांना देखील चांगले संस्कारी मुले-मुली हवे असतील तर, आपल्या मुलांसाठी वेळ देण्याचे आवाहन केले.
आमदार संग्राम जगताप यांनी आजच्या युवकांना दिशा देण्यासाठी युवा एकसाथ फाउंडेशनचे कार्य प्रेरणादायी आहे. युवक-युवतींच्या जीवनात एक पाऊल जरी चुकीचे पडले तर संपूर्ण आयुष्य बर्बाद होते. यासाठी दिशादर्शकाची भूमिका फाऊंडेशन घेत असल्याचे त्यांनी स्पष्ट करुन त्यांच्या सामाजिक उपक्रमाचे कौतुक केले. अप्पर पोलीस अधीक्षक प्रशांत खैरे यांनी युवक-युवतींना जागृक राहून व आई-वडिलांची जाणीव ठेऊन आपली जबाबदारी आणि कर्तव्य पार पाडण्याचे आवाहन केले. कार्यक्रम यशस्वी करण्यासाठी राज जाधव, सुमित भिंगारदिवे, प्रशांत कनगरे, टेरी वाघमारे, हर्षल शिरसाठ, प्रिया धायतडक, प्रितेश मोहिते, प्रिती क्षेत्रे, यश शेकटकर, शुभम पवार, श्रावणी घोडके, शार्दुल लोखंडे, वैभव गुढेकर आदींनी परिश्रम घेतले.
.