पीपल्स हेल्पलाईन व भारतीय जनसंसदेच्या वतीने हरियाणाचे मुख्यमंत्री नायबसिंह सैनी यांना मानवंदना
महाराष्ट्रातील घरकुल वंचितांना भूमीगुंठा देण्याची मागणी
नगर (प्रतिनिधी)- विधानसभा निवडणुकीच्या पार्श्‍वभूमीवर सत्तापेंढारी आणि लोकमकात्यांच्या विरोधात पीपल्स हेल्पलाईन व भारतीय जनसंसदेच्या वतीने सावेडी बस स्थानकाच्या जागेवर भाकरी फिरवा सूर्यनामा करण्यात आला. घरकुल वंचितांना भूमीगुंठा देण्याचे जाहीर करणारे हरियाणाचे मुख्यमंत्री नायबसिंह सैनी यांचा राष्ट्रीय सन्मानाने मानवंदना देण्यात आली. तर सावेडी बस स्थानक येथील पडिक जागेवर भव्य स्वरुपाचे मध्यवर्ती बस स्थानक होण्यासाठी प्रतिकात्मक भूमीपूजन करण्यात आले.
गेल्या 30 ते 40 वर्षात सत्तापेंढारी आणि लोकमकात्यांनी मतकोंबड आणि जातीमंडूकांची अक्कलमारी करुन मागच्या दाराने सत्ता मिळवून लोकशाहीमध्ये वेड्या बाभळीची शेती सुरू ठेवली आहे. याला शह देण्यासाठी संघटनांच्या वतीने भाकरी फिरवा सूर्यनामा करण्यात आला. यावेळी जय शिवाजी जय डिच्चू कावा! च्या घोषणा देऊन चांगल्या उमेदवारास मतदान करुन निवडून देण्याचे आवाहन करण्यात आले. यावेळी ॲड. कारभारी गवळी, अशोक सब्बन, वीरबहादूर प्रजापती, अशोक भोसले, पोपट भोसले, बबलू खोसला, अरुण खिची, विजय शिरसाठ, रईस शेख, अशोक डाके, शाहीर कान्हू सुंबे, बाळासाहेब पालवे, आनंदा आढाव, अंबादास वाघ, दिलीप जाधव आदी उपस्थित होते.
हरियाणा सरकारच्या वतीने राज्यातील घरकुल वंचितांना एक भूमीगुंठा जमीन घरासाठी देण्याची घोषणा मुख्यमंत्री नायबसिंह सैनी यांनी नुकतीच केली आहे. या धर्तीवर महाराष्ट्रासह देशातील इतर राज्यात अशा पध्दतीने घरकुल वंचितांचा प्रश्‍न सोडवला जावा, यासाठी तमाम घरकुल वंचितांच्या आशा पल्लवित झाल्या आहेत. तर घरकुल वंचितांच्या प्रश्‍नांची दखल घेतल्याबद्दल संघटनांच्या वतीने सैनी यांना मानवंदना देण्यात आली आहे. तर महाराष्ट्रातील घरकुल वंचितांना देखील भूमिगुंठा जमीन मिळण्याची मागणी घरकुल वंचितांच्या वतीने करण्यात आली आहे.
ॲड. कारभारी गवळी म्हणाले की, सात ते दहा वर्षे सातत्याने घरकुल वंचितांना हक्काचा निवारा मिळण्यासाठी केंद्र व राज्य सरकारकडे संघटनेने सातत्याने पाठपुरावा सुरु ठेवला आहे. याबाबत सरकारने सकारात्मक भूमिका घेतली नव्हती, परंतु हरियाणाच्या सरकारने देशात भूमिगुंठा वाटण्याचा निर्णय घोषित केल्यामुळे घरकुल वंचितांमध्ये आनंदाचे वातावरण पसरले आहे. राज्यात सत्तेत येणाऱ्या सरकारने प्राधान्याने घरकुल वंचितांच्या प्रश्‍नाकडे लक्ष देऊन ते सोडविण्याची गरज असल्याचे त्यांनी सांगितले.
अशोक सब्बन म्हणाले की, गेल्या 30 ते 40 वर्षात भांडवल, भांडवलदार, सत्तापेंढाऱ्यांनी मतदारांना पैसे देऊन किंवा जाती-धर्माचा वापर करून मागच्या दाराने सत्ता मिळवली. महाराष्ट्रासह देशभरात मतदारांची अक्कलमारी करून मतदारांची मते मिळवण्याचे तंत्र त्यांनी विकसित केले आहे. यातून मताचे खत करून पुढची पाच वर्षे काही एक काम न करता मधल्या काळात सत्ता, संपत्ती आणि फुकटची प्रतिष्ठा मिळवणारा मोठा वर्ग तयार झाला आहे. त्याला शह देण्यासाठी यंदाच्या महाराष्ट्रातील विधानसभा निवडणुकीत मतदारांनी डिच्चू कावा तंत्राचा वापर करण्याचे त्यांनी आवाहन केले.
कार्यकर्त्यांनी एकमेकांना लाडू भरून आनंद व्यक्त केला. त्याचवेळेला भूमिगुंठा लोकशाही रक्षाबंधन साजरा करुन एकमेकांच्या हातावर तिरंगी धागे बांधले. सावेडी बस स्थानकासाठी एसटी महामंडळाने सन 1980 साली 11 एकर जमीन संपादित केली. त्यापैकी अडीच एकर जमीन भारतरत्न डॉ.बाबासाहेब आंबेडकर स्मारकाला दिली, परंतु गेली 44 वर्षे एसटी महामंडळाने सावेडी बस स्थानकाची जागा पडून ठेवली. त्यामुळे संघटनांनी आजपर्यंतच्या खासदार आमदारांच्या निष्क्रियतेचा निषेध नोंदवून ढब्बू लोकमकात्या सूर्यनामा केला. कार्यकर्त्यांनी मतदार अक्कलवारी शून्यावर आणण्यासाठी लोकशाही राखी बांधून जाहीर रीतीने सूर्य साक्षीने शपथ घेतली.