उच्च शिक्षणापर्यंत उचलणार सर्व खर्च; दूलेचांदगाव येथील गरजू विद्यार्थ्यांना आधार
ज्ञान हा यशाचा प्रकाश मार्ग -बोडखे
नगर (प्रतिनिधी)- गरजू घटकातील मुलांना शिक्षणासाठी सातत्याने प्रोत्साहन व आधार देणारे शिक्षक परिषदेचे शहर जिल्हाध्यक्ष तथा माध्यमिक शिक्षक सोसायटीचे संचालक बाबासाहेब बोडखे यांनी दूलेचांदगाव (ता. पाथर्डी) येथील सच्चिदानंद बंडोबा महाराज माध्यमिक विद्यालयाच्या 5 विद्यार्थ्यांचे उच्च शिक्षणापर्यंत शैक्षणिक पालकत्व स्विकारले. यामधील दोन विद्यार्थ्यांनी कोरोना काळात पालक गमावलेले असून, तीन विद्यार्थी हे एकल पालकत्व असून त्यांच्या शिक्षणाची जबाबदारी बोडखे यांनी घेतली आहे.
शाळेतील गरजू विद्यार्थ्यांना बोडखे यांच्या हस्ते शैक्षणिक साहित्याचे वाटप करण्यात आले. यावेळी मुख्याध्यापक मदन चन्ने, सहशिक्षक राजेंद्र मरकड, यादव घुले, पांडुरंग चव्हाण, अंबादास लाड, हौशाबापू भांड, मंजुषा दळवी, सदिच्छा बांगर, आशाबाई ढाळे, सुभाष गव्हाणे, आत्माराम दहिफळे, महेंद्र राजगुरु आदींसह विद्यार्थी मोठ्या संख्येने उपस्थित होते.
बाबासाहेब बोडखे म्हणाले की, आजचे विद्यार्थी हे उद्याच्या सक्षम भारताचे भवितव्य आहे. त्यांचे भवितव्य उज्वल घडल्यास देश सक्षम होणार आहे. यासाठी प्रत्येकाने गरजू घटकातील विद्यार्थ्यांसाठी हातभार लावण्याची गरज आहे. शिक्षण घेऊन प्रत्येकाने चांगले माणूस म्हणून घडावे. आई-वडिलांचे स्वप्न साकार करुन, त्यांना मान खाली घालण्याची वेळ येऊ देऊ नका. ज्ञानाने संपन्न झाल्यास यशाची मार्ग सापडतात. ज्ञान हा यशाचा प्रकाश मार्ग असल्याचे त्यांनी सांगितले.
मुख्याध्यापक मदन चन्ने म्हणाले की, गरजू विद्यार्थ्यांना प्रोत्साहन देण्याकरिता बाबासाहेब बोडखे सातत्याने विविध उपक्रमातून आधार देण्याचा प्रयत्न करत आहे. दिव्यांग विद्यार्थ्यांपासून ते गरजू विद्यार्थ्यांना ते वर्षभर शैक्षणिक मदत देत असतात. अनेक विद्यार्थी त्यांनी शिक्षणासाठी दत्तक घेतले असून, गरजू विद्यार्थ्यांना ते विविध प्रकारची मदत करत आहे. बिकट परिस्थितीतून आलेले बोडखे यांचे शिक्षण क्षेत्रात गरजू विद्यार्थ्यांना आधार देण्याचे सुरु असलेले कार्य दिशादर्शक असल्याचे त्यांनी सांगितले.
बोडखे यांनी माध्यमिक शाळेत शिक्षण घेणारे श्रेया ठोंबे, तुषार पवार, सार्थक घनवट, श्रेयस नाकाडे, आयेशा सय्यद या पाच विद्यार्थांचे उच्च शिक्षणा पर्यंत येणाऱ्या सर्व खर्चाची जबाबदारी घेतली आहे. तर शाळेतील इतर गरजू विद्यार्थ्यांना देखील शैक्षणिक मदत देण्याचे जाहीर केले.