अहमदनगरच्या बस स्थानकात उतरल्याने नातेवाईकांची शोधाशोध
अहमदनगर (प्रतिनिधी)- निमगाव चोभा (ता. आष्टी, जि. बीड) येथून शिर्डीला निघालेल्या 85 वर्षीय आसराबाई माणिक पवार अहमदनगरच्या माळीवाडा बस स्थानक येथे उतरल्याने पुन्हा नातेवाईकांना सापडल्या नसल्याने आष्टी पोलीस स्टेशनला हरवल्याची तक्रार दाखल करण्यात आली आहे. सदर महिला कोणाला दिसल्यास अथवा माहिती मिळाल्यास जवळच्या पोलीस स्टेशनला किंवा नातेवाईकांना संपर्क साधण्याचे आवाहन पवार कुटुंबीयांच्या वतीने करण्यात आले आहे.
7 एप्रिल रोजी सकाळी 11:30 वाजता त्यांचा मुलगा सोपान पवार याने आसराबाई पवार यांना शिर्डी येथील त्यांचा दुसरा मुलगा अच्युत पवार यांच्याकडे पाठविण्यासाठी कडा बस स्थानक येथे जावून बीड ते पुणे या एसटीमध्ये बसविले होते. त्या अहमदनगर बस स्थानक येथे उतरून दुसऱ्या बस मधून शिर्डीकडे जाणार होत्या. परंतु संध्याकाळ झाली तरी त्या शिर्डीत दुसऱ्या मुलाकडे पोहोचले नाही.
आसराबाई यांच्याकडे असलेला मोबाईल देखील बंद झालेला असून, त्यांच्याशी नातेवाईकांचा संपर्क होऊ शकलेला नाही. याप्रकरणी अहमदनगर बस स्थानक, इतर ठिकाणी आणि नातेवाईकांकडे चौकशी केली असता त्या आढळून आल्या नाहीत. सदरील ज्येष्ठ महिला कोठे आढळल्यास किंवा पाहिल्यास 9405103784 व 97666765 या नंबरवर संपर्क साधण्याचे सांगण्यात आले आहे.