महाराष्ट्र राज्य सुरक्षा महामंडळात नियुक्ती झालेल्या जवानांची जिल्हा रूग्णालयात अडवणुक थांबवावी
आलेल्या सर्व जवानांची आरोग्य चाचणी करण्याची मागणी
अहमदनगर (प्रतिनिधी)- महाराष्ट्र राज्य सुरक्षा महामंडळात नियुक्ती झालेल्या जवानांची आरोग्य चाचणीसाठी अहमदनगर जिल्हा रूग्णालयात अडवणुक होत असल्याच्या निषेधार्थ सैनिक समाज पार्टीच्या वतीने जिल्हा शल्य चिकित्सक यांच्या दालनात गुरुवारी (दि. 15 सप्टेंबर) ठिय्या आंदोलन करण्यात आले. या आंदोलनात जिल्हाध्यक्ष रावसाहेब काळे, दिपक वर्मा, शहर जिल्हाध्यक्ष विलास शिंदे, अक्षय शिर्के, शाहीर कान्हू सुंबे, संभाजी केदार, आकाश खंडागळे आदींसह भरती झालेले जवान सहभागी झाले होते.
महाराष्ट्र राज्य सुरक्षा महामंडळ दौंड येथे जिल्ह्यातून 500 जवान उमेदवारांची भरती करण्यात आलेली आहे. या जवानांना आरोग्य चाचणीचे प्रमाणपत्र सादर करणे बंधनकारक असून, दररोज 80 ते 90 जवान आरोग्य चाचणीसाठी जिल्हा रुग्णालयात येत आहे. मात्र जिल्हा रुग्णालयात फक्त 20 जवानांनाच आरोग्य चाचणी तपासणीचे फॉर्म दिले जात असल्याने जिल्हा रुग्णालयात दिवसंदिवस गर्दी वाढत आहे. हे प्रमाणपत्र 20 सप्टेंबर पर्यंत सादर करावयाचे आहे. गाव पातळीवरुन येणार्‍या जवानांना आरोग्य तपासणी न झाल्यास मोठा आर्थिक व मानसिक त्रास सहन करावा लागत असल्याचे स्पष्ट करण्यात आले आहे.
अहमदनगर जिल्हा रुग्णालयात आरोग्य चाचणीसाठी अडवणुक होत नसल्याने काहींनी बीड जिल्हा रुग्णालयात जाऊन हे प्रमाणपत्र घेतले असून, जिल्ह्याच्या दृष्टीने ही मोठी शोकांतिका असल्याचे जिल्हाध्यक्ष रावसाहेब काळे यांनी म्हंटले आहे. या प्रकरणी प्रभारी जिल्हा शल्य चिकित्सक बारवकर यांच्याशी चर्चा करण्यात आली. बारवकर यांनी सर्व केस पेपर देण्याचे व यासाठी विशेष शनिवारी देखील ओपीडी सुरु ठेवण्याचे आश्‍वासन दिल्याने आंदोलन मागे घेण्यात आले.
