आमदार संग्राम जगताप यांनी दिल्या सार्वजनिक बांधकाम विभागाला सूचना
अहमदनगर (प्रतिनिधी)- नगर-पुणे रोडवरील रेल्वे उड्डाणपुलाच्या दुरुस्तीचे काम लवकरच सुरू होणार असुन, याबाबत आमदार संग्राम जगताप यांनी सार्वजनिक बांधकाम विभागाच्या अधिकाऱ्यांची बैठक घेत पुलाच्या दुरुस्ती संदर्भात सूचना दिल्या. या बैठकीस आमदार संग्राम जगताप यांच्यासह माजी सभापती अविनाश घुले, माहिती अधिकार कार्यकर्ता महासंघाचे वैभव कदम, सार्वजनिक बांधकाम विभागातील वरिष्ठ अधिकारी उपस्थित होते.
वैभव कदम हे गेले अडीच वर्षांपासून रेल्वे उड्डाणपुलाच्या दुरुस्तीसाठी शासनाकडे वेळोवेळी पाठपुरावा करीत होते. त्यांनी राज्याचे बांधकाम सचिव, जिल्हाधिकारी, अधीक्षक अभियंता नगर यांच्याकडे निवेदन देऊन रेल्वे उड्डाणपुलाच्या दुरुस्तीची मागणी केली होती. डिसेंबर 2019 मध्ये या रेल्वे उड्डाणपुलावर बस व ट्रक यांच्यात भीषण अपघात झाला होता. ज्यात जीवितहानीसह अनेक जण गंभीर जखमी झाले होते. तेव्हापासून वैभव कदम यांनी पूल दुरुस्तीसाठी पाठपुरावा सुरू केला होता.
अनेक वेळा निवेदने व पत्रव्यवहार करूनही सार्वजनिक बांधकाम विभाग या रेल्वे उड्डाणपुलाच्या दुरुस्तीसाठी टाळाटाळ करीत होते. त्यामुळे वैभव कदम यांनी आमदार संग्राम जगताप यांच्याशी पत्रव्यवहार करीत ही बाब निदर्शनास आणून देत उड्डाणपुलाच्या दुरुस्तीबाबत गांभीर्याने दखल घेण्याची विनंती केली होती.
आमदार जगताप यांनी याची तात्काळ दखल घेत सार्वजनिक बांधकाम विभागाच्या अधिकाऱ्यांची बैठक घेऊन नागरिकांच्या सुरक्षिततेच्या दृष्टीने आवश्यक त्या सूचना पूल दुरुस्ती संदर्भात केले आहेत. ज्यामध्ये रेल्वे उड्डाण पुलावरील स्टेअर केस नव्याने बांधणे,जीर्ण झालेले कठडे काढून नवीन कठडे बांधणे, पांढरे पट्टे मारणे, रिफ्लेक्टर बसवणे आदी सूचना बैठकीत केल्या असुन सार्वजनिक बांधकाम विभागाच्या अधिकाऱ्यांनीही संबंधितांना याबाबत आदेश दिले असून सदरचे काम लवकरच सुरू करणार असल्याचे यावेळी सांगितले.