झाडे लावा, झाडे जगवा! चा संदेश
पर्यावरणावर शाश्वत विकास अवलंबून -इंजि. केतन क्षीरसागर
अहमदनगर (प्रतिनिधी)- राष्ट्रवादी युवक काँग्रेसच्या वतीने झाडे लावा, झाडे जगवा! हा संदेश देत सावेडी येथील गारगी हास्य क्लबच्या महिलांना वड, पिंपळ, कडुनिंब, पेरू यांसारख्या फळ व फुलझाडांच्या रोपांचे वाटप करण्यात आले.
आमदार संग्राम जगताप यांच्या वाढदिवसानिमित्त राष्ट्रवादी युवकचे शहर जिल्हाध्यक्ष इंजि. केतन क्षीरसागर यांनी हा उपक्रम राबविला. या उपक्रमास सर्व हास्य क्लबच्या महिला सदस्यांचा उत्स्फूर्त सहभाग लाभला. या उपक्रमात ऑक्सिजननिर्मितीसाठी महत्त्वाचे ठरणारे व पर्यावरणाचा समतोल राखणार्या झाडांची रोपे देण्यात आली. महिलांनी देखील घेतलेल्या रोप आपल्या घराच्या अंगणात लाऊन त्याचे संवर्धन करण्याचा संकल्प केला.
इंजि. केतन क्षीरसागर म्हणाले की, पर्यावरण संवर्धनाच्या चळवळीत योगदान ही एक देश सेवाच आहे. मनुष्याच्या भावी पिढीसाठी झाडे ही काळाची गरज बनली आहे. पर्यावरणावर मनुष्याचे जीवन सुखी व आनंदी होणार आहे. शहर विकासात्मक दृष्टीकोनाने बदलत असताना, शहराचा परिसर हिरवाईने फुलविण्यासाठी राष्ट्रवादी युवक काँग्रेस योगदान देत आहे. पर्यावरणावर शाश्वत विकास अवलंबून असून, वृक्षरोपण व संवर्धनाने पर्यावरणाचे प्रश्न सुटणार असल्याचे त्यांनी सांगितले.
