मुलाखतीद्वारे निवडले जाणार पदाधिकारी
राजकारणात नवीन युवकांना काम करण्याची संधी देण्याचा प्रयत्न -इंजि. केतन क्षीरसागर
अहमदनगर (प्रतिनिधी)- राष्ट्रवादी युवक काँग्रेसची नूतन शहर कार्यकारणी नियुक्तीसाठी आमदार संग्राम जगताप यांच्या मार्गदर्शनाखाली सावेडी येथे मुलाखती घेण्यात आल्या. नवलेनगर, गुलमोहर रोड येथील संपर्क कार्यालयात झालेल्या मुलाखतीसाठी युवकांचा उत्स्फुर्त प्रतिसाद लाभला. युवकांचे संकल्प अर्ज घेऊन त्यांच्या मुलाखती घेण्यात आल्या.
राष्ट्रवादीचे शहर जिल्हाध्यक्ष प्रा. माणिक विधाते यांच्या अध्यक्षतेखाली झालेल्या या मुलाखतीच्या कार्यक्रमासाठी राष्ट्रवादी युवकचे शहर जिल्हाध्यक्ष इंजि. केतन क्षीरसागर, विधानसभा अध्यक्ष सुमित कुलकर्णी, उद्योग व व्यापार सेलचे अनंत गारदे, भिंगार राष्ट्रवादीचे शहराध्यक्ष संजय सपकाळ, क्रीडा सेलचे घनश्याम सानप, ओबीसी सेलचे अमित खामकर, युवती सेलचे अंजली आव्हाड, कामगार सेलचे गजेंद्र भांडवलकर, विद्यार्थी सेलचे वैभव ढाकणे, सावेडी विभाग प्रमुख धीरज उकिर्डे आदी उपस्थित होते.
प्रास्ताविकात घनश्याम म्हणाले की, शहर विकासात्मक रुपाने बदलत असताना नवविचार घेऊन कार्य करणार्‍या युवकांना जोडण्याचे काम राष्ट्रवादी युवकाच्या माध्यमातून करण्यात येत आहे. राज्यात पहिल्यांदाच युवकांच्या मुलाखती घेऊन त्यांना राजकारणात काम करण्याची संधी अहमदनगर शहर युवकच्या माध्यमातून उपलब्ध करुन देण्यात आली असल्याचे त्यांनी सांगितले.
युवकचे शहर जिल्हाध्यक्ष इंजि. केतन क्षीरसागर म्हणाले की, शहरातील युवकांची नवीन फळी पक्षाला जोडण्यासाठी या मुलाखतीचे आयोजन करण्यात आले आहे. राजकारणात नवीन युवकांना काम करण्याची संधी देण्याचा प्रयत्न आहे. पहिल्यांदाच राष्ट्रवादी युवकच्या माध्यमातून मुलाखतीद्वारे पदाधिकारी निवडण्याचा उपक्रम घेण्यात आला आहे. राजकीय वारसा नसताना आमदार संग्राम जगताप यांनी विश्‍वास टाकून युवक शहर जिल्हाध्यक्षपदाच्या माध्यमातून काम करण्याची मोठी संधी दिली. याच प्रकारे इतर युवकांना देखील संधी देण्यासाठी या मुलाखतीचे आयोजन करण्यात आले आहे. नवीन व्हिजनने कार्य करणार्‍या युवकांना संधी देण्याचा प्रयत्न नवीन कार्यकारणीच्या माध्यमातून केले जाणार असून, पूर्वी काम करणारे पदाधिकारी व नवीन पदाधिकार्‍यांना एकत्र घेऊन लवकरच नवीन कार्यकारणी जाहीर केली जाणार असल्याचे त्यांनी स्पष्ट केले.
प्रा. माणिक विधाते म्हणाले की, राष्ट्रवादीची फादर बॉडी निवडताना 11 महिने लागली. सर्व भागातील व सर्व क्षेत्रातील काम करणार्‍यांचा अभ्यास करुन त्यांना पदाच्या माध्यमातून संधी देण्याचे काम केले गेले. पद हे मोठ्या जबाबदारीचे काम आहे. अधिकार मिळाल्याने कर्तव्य देखील वाढतात. पदाचे ग्लॅमर मिरविण्यासाठी नव्हे, तर समाजात काम करुन चमकण्याची संधी असते. नवीन युवकांना राजकारण व समाजकारणात आणण्यासाठी हा उपक्रम दिशादर्शक असल्याचे त्यांनी सांगितले. तर शहराच्या खुटलेल्या विकासाला आमदार संग्राम जगताप यांनी चालना देऊन विकासाला गती दिली दिली. विकासाला वेळ लागतो, विकासाच्या दिशेने वाटचाल सुरू असून, बदलही दिसत असल्याचेही सांगितले. यावेळी उपस्थित पदाधिकार्‍यांनी युवकांना मार्गदर्शन केले.
या कार्यक्रमासाठी चर्मकार समाजाचे शिवाजी साळवे, मारुती पवार, बांधकाम व्यावसायिक संदीप गवळी, ओमकार म्हसे, उद्योजक मयूर रोहोकले, सिव्हिल कॉन्ट्रॅक्टर अक्षय नागवडे, सामाजिक कार्यकर्ते अमोल बळे, अ‍ॅड. दिग्विजय जाधव, अक्षय चव्हाण, इंजि. ललित क्षीरसागर, चेतन क्षीरसागर, दीपक वाघ, पोलीस दलातील राष्ट्रीय शरीर सौष्टवपटू राजेश पुंडे, वैभव ससे, इंजी अनिकेत पानमळकर, निलेश ढवण आदी उपस्थित होते.