मॅककेअर हॉस्पिटलने उपचारा बरोबर आधार देऊन रुग्णांशी आपुलकीचे नाते निर्माण केले -आ. संग्राम जगताप
अहमदनगर (प्रतिनिधी)- कोरोनाच्या भयानक परिस्थितीमधून नगरकर गेले. पहिल्या लाटेपासून जीवाची पर्वा न करता, मॅककेअर हॉस्पिटलने दिलेल्या आरोग्य सेवेने अनेकांचे जीव वाचले. हॉस्पिटलने उपचारा बरोबर आधार दिल्याने नगरकरांशी आपुलकीचे नाते निर्माण केले. प्रत्येक व्यक्ती त्यांना कुटुंबाप्रमाणे जोडला गेला. आरोग्य क्षेत्रात मानाचा तुरा रोवण्याचे कार्य मॅककेअर हॉस्पिटलने केले असल्याचे प्रतिपादन आमदार संग्राम जगताप यांनी केले.
सावेडी येथील मॅककेअर हॉस्पिटलच्या पाचव्या वर्धापन दिनानिमित्त आयोजित करण्यात आलेल्या रक्तदान शिबीराच्या उद्घाटनाप्रसंगी आमदार जगताप बोलत होते. यावेळी माजी नगरसेवक संभाजी पवार, अजिंक्य बोरकर, प्रॉमिनंट समुहाचे अध्यक्ष जावेद शेख, राष्ट्रवादी सामाजिक न्याय विभागाचे सुरेश बनसोडे, हॉस्पिटलचे संचालक डॉ. सतीश सोनवणे, डॉ. मोहंम्मद माजिद, डॉ. प्रशांत पठारे, डॉ. सुदाम जरे, डॉ. अभिजीत शिंदे, डॉ. आनंद काशीद, डॉ. पियुष पाटील आदी उपस्थित होते.
पुढे आमदार जगताप म्हणाले की, नवनवीन आजार व साथीचे रोग यांमुळे आरोग्य क्षेत्रात झपाट्याने बदल होत असून, एक आव्हानात्मक बाब डॉक्टरांपुढे उभी राहिली आहे. सर्वात मोठा जिल्हा व इतर जिल्ह्याचे ग्रामीण शहराला जोडलेले असल्याने शहराच्या हॉस्पिटलवर मोठा ताण येत असल्याचे त्यांनी सांगितले.
डॉ. सतीश सोनवणे म्हणाले की, कोरोना काळात अनेकांचे जीव वाचविण्यासाठी हॉस्पिटलच्या प्रत्येक डॉक्टर व सहकारीने मोठ्या सामर्थ्याने लढा दिला. यामध्ये एक साथीदार डॉक्टर गमावला गेला. अविरतपणे मॅककेअर रुग्णसेवेचा वसा पुढे चालवित आहे. कोरोना काळात आमदार जगताप यांनी खचलेल्या रुग्णांना प्रत्यक्ष भेटी देऊन त्यांचे मनोबल वाढवले. शहराच्या विकासाविषयी आमदारांची आत्मियता असून, विकासाच्या व्हिजनने ते कार्य करत आहे. समाजाला देणे लागते या भावनेने हॉस्पिटलच्या माध्यमातून शहर विकासासाठी देखील योगदान दिले जाणार असल्याचे त्यांनी सांगितले.
डॉ. सुदाम जरे यांनी पाहुण्यांचा परिचय करून दिला. डॉ. प्रशांत पठारे यांनी मागील पाच वर्षाचा आढावा घेऊन रुग्णांना अदयावत उपचार पद्धती मिळावी हा मॅककेअरचा नेहमीच प्रमुख उद्देश होता. यातूनच कर्करोग, हृदय विकार, मेंदूचे गंभीर आजार, हाडांचे आजार, मूत्रविकार ,गर्भवती महिलांची काळजी घेण्यासाठी लेबर रूम, आयसीयू, ऑपरेशन थिएटर, पॅथॉलॉजी लॅब, डायलेसिस, थर्मो मॅमोग्राफी, ट्रॉमा युनिट, लॅप्रोस्कोपी शस्त्रक्रियेची सुविधा निर्माण झाली. या सगळ्यांनी युक्त अशी अद्ययावत यंत्रणा मॅककेअर अतिशय समर्थपणे सांभाळत असल्याचे त्यांनी सांगितले.
या रक्तदान शिबीरात हॉस्पिटलचे सर्व डॉक्टर, नर्सेस, कर्मचारी व रुग्णांच्या नातेवाईकांनी देखील रक्तदान केले. रक्तदान शिबीरास जन कल्याण रक्तपेढीचे सहकार्य लाभले. यावेळी डॉ. मरियम माजिद, डॉ. मनीषा शिरसाठ, डॉ. आशिष शर्मा, सुहास रानडे आदींसह विविध क्षेत्रातील मान्यवर उपस्थित होते. कार्यक्रमाचे सूत्रसंचालन रेहान सय्यद यांनी केले. आभार डॉ. सुदाम जरे यांनी मानले.
