अन्याय निवारण निर्मूलन सेवा समितीने वेधले महसुल प्रशासनाचे लक्ष
दंड न भरणार्‍याची स्थावर जंगम मालमत्ता जप्त करण्याची मागणी
अहमदनगर (प्रतिनिधी)- भालवणी (ता. पारनेर) येथे विनापरवाना मुरुम उत्खनन प्रकरणात कोट्यावधीचा दंडापोटी काही लाख रुपयांचा दंड भरुन उर्वरीत रक्कम थकित ठेवणार्‍याची महसूल अधिनियम 1966 चे कलम 176 व 182 नुसार स्थावर जंगम मालमत्ता जप्त करण्याची मागणी अन्याय निवारण निर्मूलन सेवा समितीचे जिल्हाध्यक्ष अरुण रोडे यांनी जिल्हाधिकारी यांच्याकडे निवेदनाद्वारे केली.
पारनेर तालुक्यातील भालवणी येथील गट नंबर 37 मध्ये विनापरवाना मुरुम उत्खनन केल्याने दिपाली राजेंद्र आव्हाड यांना 1 कोटी 10 लाख 44 हजार इतकी रॉयल्टी रक्कम पारनेर तहसील यांनी मार्च 2022 मध्ये आकारली होती. परंतु राजेंद्र आव्हाड यांनी प्रशासनाशी अर्थपूर्ण संबंध ठेवून अद्यापर्यंत वरील रकमेतून फक्त 22 लाख रुपये इतकी रॉयल्टी रक्कम भरली असून, उर्वरीत कोट्यावधीची रॉयल्टी थकित आहे. आव्हाड यांनी शासनाला पूर्ण रॉयल्टी न भरता फसवणुक करुन मोठा महसूल बुडवला असल्याचा आरोप रोडे यांनी केला आहे.
महसुल प्रशासनाने आव्हाड यांच्याकडून एका महिन्याच्या आत पूर्ण रॉयल्टीची रक्कम वसुल करावी, अथवा त्यांची स्थावर जंगम मालमत्ता जप्त करण्याची मागणी अन्याय निवारण निर्मूलन सेवा समितीच्या वतीने करण्यात आली आहे. अन्यथा जिल्हाधिकारी कार्यालया समोर उपोषण करण्याचा इशारा देण्यात आला आहे.