वादळी पाऊसाने नुकसान झालेल्या शरणपूर वृद्धाश्रमाला अन्न-धान्यासह आर्थिक मदत
शहरातील विविध स्वयंसेवी संघटनेचे प्रतिनिधी व सामाजिक कार्यकर्त्यांचा पुढाकार
अहमदनगर (प्रतिनिधी)- ज्येष्ठांची सेवा हीच खरी ईश्‍वर सेवा आहे. ज्यांनी जग दाखविले त्यांनी दुर्लक्ष न करता, त्यांना माणुसकी व प्रेमाने आधार देणे प्रत्येकाची जबाबदारी आहे. उतार वयात मायेचा आधार सर्वात मोठा असतो. माता-पित्यांची काळजी घेतल्यास वृध्दाश्रमाची गरज पडणार नसल्याचे प्रतिपादन सामाजिक कार्यकर्ते विजय भालसिंग यांनी केले.
मान्सूनपूर्वीच वादळी वार्‍यासह झालेल्या पाऊसाने खडकाफाटा (ता. नेवासा) येथील शरणपूर वृद्धाश्रमाचे मोठे नुकसान झाले होते. यामध्ये राहणार्‍या अनेक वृध्दांचा संसार उघड्यावर पडला होता. अशा परिस्थितीमध्ये स्वयंसेवी संघटनांचे प्रतिनिधी व सामाजिक कार्यकर्ते यांनी एकत्र येऊन शरणपूर वृद्धाश्रमाला आर्थिक व अन्न-धान्याची मदत दिली. यावेळी यावेळी भालसिंग बोलत होते. राष्ट्रपती आदर्श शिक्षक पुरस्कार प्राप्त डॉ. अमोल बागुल, छावा संघटनेचे प्रदेशाध्यक्ष रावसाहेब काळे, उमंग फाउंडेशनचे संचालक डॉ. संतोष गिर्‍हे यांनी पुढाकार घेऊन हा सामाजिक उपक्रम राबविला. यावेळी जिल्हा सहकारी बँकेच्या महिला बचत गट व्यवस्थापिका विद्या तन्वर, जय असोसिएशन ऑफ एनजीओचे राज्याध्यक्ष अ‍ॅड. महेश शिंदे, वृद्धाश्रमाचे संचालक रावसाहेब मगर, शाहीर कान्हू सुंबे, संतोष मगर, ज्योती मगर, सुरेखा मगर आदी उपस्थित होते.
डॉ. अमोल बागुल म्हणाले की, जेष्ठ नागरिकांचा अनुभवाच्या ठेवीतून युवा पिढीने समाजाच्या समस्या सोडविण्यासाठी आशिर्वादासह अनुभवाची शिदोरी घेतली पाहिजे. वृध्दापकाळात केलेली सेवा ही सर्वश्रेष्ठ सेवा ठरत असल्याचे त्यांनी सांगितले.
रावसाहेब काळे यांनी वृद्धाश्रमात कोरोना काळातही घरातील कुटुंबाच्या सदस्याप्रमाणे सांभाळ केला. सर्वांच्या सहयोगाने खरी समाजसेवा येथे घडत असल्याचे सांगितले. अ‍ॅड. महेश शिंदे यांनी सामाजिक संस्था व युवकांनी कुटुंबाचा आधार असणार्‍या ज्येष्ठ व्यक्तींना आधार व प्रेम देऊन समाज प्रवाहात सोबत ठेवण्यासाठी प्रयत्न करण्याचे सांगितले.
विद्या तन्वर म्हणाल्या की, उतार वयातून सर्वांना मार्गक्रमण करायचे आहे. मुलांसमोर चांगला आदर्श ठेवल्यास ते देखील आपल्या आई-वडिलांचा चांगला सांभाळ करतील. यासाठी वृद्धाश्रमातील आजी-आजोबांना आई-वडील समजून सहकार्य करण्याचे त्यांनी आवाहन केले. सदर मदत देण्यासाठी आलेल्या अनेकांचे डोळे देखील पाणावले. डॉ. संतोष गिर्‍हे यांनी वृद्धाश्रमातील ज्येष्ठांची मोफत आरोग्य तपासणी केली.