नागरिकांची मोफत मधुमेह व दंत रोग तपासणी
युवकांमध्ये मधुमेहाचे वाढते प्रमाण चिंताजनक -डॉ. अक्षय फिरोदिया
अहमदनगर (प्रतिनिधी)- युवकांमध्ये मधुमेहाचे वाढते प्रमाण चिंताजनक आहे. जीवनमान बदलल्याने मधुमेह सारखे गंभीर आजार छपाट्याने वाढत आहे. भारत हा मधुमेह रुग्णांची राजधानी म्हणून ओळखला जातो. हा आजार सायलंट किलर असून, संपूर्ण शरीराला आतून पोखरत असतो. धकाधकीच्या जीवनात या आजाराला रोखण्यासाठी नियमित व्यायाम व योग्य आहार पध्दतीचा अवलंब करण्याचे आवाहन डॉ. अक्षय फिरोदिया यांनी केले.
लायन्स व लिओ क्लब ऑफ अहमदनगर, आरोग्य आधार ट्रस्टच्या वतीने समाजात वाढता मधुमेह आजार रोखण्यासाठी जनजागृती आणि मधुमेह व दंत रोग तपासणी शिबिराचे आयोजन करण्यात आले होते. या शिबिराच्या उद्घाटनाप्रसंगी डॉ. फिरोदिया बोलत होते. प्रारंभी आरोग्य आधारचे शरद मुनोत यांच्या हस्ते या शिबिराचे उद्घाटन करण्यात आले. यावेळी जनक आहुजा, झोन चेअरमन आनंद बोरा, लायन्सच्या अध्यक्षा सिमरनकौर वधवा, लिओ अध्यक्षा हरमनकौर वधवा, अजिंक्य बोरकर, डॉ. अनघा पारगावकर, डॉ. अक्षय फिरोदिया, डॉ. मानसी असणानी, सुधीर लांडगे, हरजितसिंह वधवा, विकी कंत्रोड, किशोर कंत्रोड, आंचल कंत्रोड, जस्मितसिंह वधवा, रुचिता कुमार, प्रकल्प प्रमुख डॉ. संजय असणानी, प्रित कंत्रोड, दिशा तलवार, तमन्ना तलवार आदी उपस्थित होते.
प्रास्ताविकात डॉ. सिमरनकौर वधवा म्हणाल्या की, महागाई व आर्थिक परिस्थिती नसल्याने मध्यम व गरजू घटकातील लोक आपल्या कुटुंबियांची नियमित आरोग्य तपासणी करु शकत नाही. लायन्सच्या माध्यमातून नियमित होणारे विविध आरोग्य शिबिराच्या माध्यमातून त्यांना मोफत तपासणीची सुविधा उपलब्ध करुन आरोग्य सेवा पुरवून त्यांचे जीवन निरोगी करण्याचे काम केले जात असल्याचे त्यांनी सांगितले. पाहुण्यांचे स्वागत हरमनकौर वधवा यांनी केले.
डॉ. मानसी असणानी म्हणाल्या की, आरोग्याच्या दृष्टीने दात देखील शरीरातील महत्त्वाचा घटक आहे. फास्टफूडमुळे कमी वयात दातांच्या समस्या वाढत आहे. कमी वयात दात काढल्याने त्याचा आरोग्यावर विपरीत परिणाम होतो. यासाठी दातांची समस्या निर्माण झाल्यास तज्ञ डॉक्टरांचा सल्ला घेऊन उपचार करणे आवश्यक असल्याचे त्यांनी स्पष्ट केले.
या शिबिरात मोठ्या संख्येने मधुमेह व दंत रोग तपासणी करुन हे आजार टाळण्याचे उपस्थितांना मार्गदर्शन करण्यात आले. आभार डॉ. संजय असणानी यांनी केले.
