परवानगीने मीटर घेऊनही वीज चोरीचा गुन्हा, विद्युत महावितरणने स्वत:चे अंग झटकल्याचा आरोप
अहमदनगर (प्रतिनिधी)- गुलमोहर रोड येथे नवरात्र उत्सवात विजेचा धक्का लागून लहान बालकाच्या अपघाती मृत्यू प्रकरणी शीख, पंजाबी, सिंधी समाजाच्या शिष्टमंडळाने अप्पर पोलीस अधीक्षक सौरभ अग्रवाल यांची भेट घेऊन कोणत्याही राजकीय व सामाजिक दबावला बळी न पडता योग्य तपास होण्याची मागणी करण्यात आली. तर या प्रकरणात मोरया युवा प्रतिष्ठाणने गणपती व नवरात्री मध्ये रितसर परवानगीद्वारे मीटर घेतले असताना, वीज चोरीचा दाखल करुन विद्युत महावितरणने या दुर्घटनेतून स्वत:चे अंग झटकण्याचा प्रयत्न केला असल्याचा आरोप करण्यात आला आहे.
नवरात्र उत्सवामध्ये गुलमोहर रोड येथील मोरया युवा प्रतिष्ठाणच्या मंडळापासून 200 मीटर अंतरावर एका बारा वर्षीय बालक रोहित जगधने यांचा दुर्देवी मृत्यू झाला. ज्या ठिकाणी ही दुर्घटना घडली, त्या ठिकाणी एम.एस.ई.बी.ने अधिकृत विज मीटर मंडळाला दिलेले होते. सदर मीटर हा गणपतीच्या दहा दिवसांकरिता आणि नवरात्री उत्सवासाठी होता. याप्रकरणात लहान बालकाचा शवविच्छेदनाचा अहवाल येण्यापूर्वी प्रतिष्ठानचे अध्यक्ष अर्जुन मदान यांच्यावर एम.एस.ई.बी.ने वीज चोरीचा गुन्हा दाखल केला. त्यात त्यांनी या प्रकरणात स्वतःचा हात झटकण्याचा प्रयत्न केलेला आहे. गुन्हा दाखल करुन स्वतःचे चुका लपविण्या प्रयत्न केला गेला आहे. सदर वीज कनेक्शन देताना एम.एस.ई.बी.ने सर्व गोष्टी पाळल्या आहेत का?, सर्व गोष्टींची खात्री करुन विज मीटर देण्यात आले होते का? याबद्दल तपासणी करण्याचे स्पष्ट करण्यात आले आहे.
बालकाचा मृत्यू व्हावा अशा कोणताच हेतू मंडळाचा नव्हता, या दुर्देवी अपघाताची मंडळाला सहानुभूती आहे. या प्रकरणात एम.एस.ई.बी.ने जबाबदारी स्विकारुन बालकांच्या परिवारास नुकसान भरपाई देण्याची गरज असताना, त्यांनी अपघातानंतर मंडळाच्या अध्यक्षावर वीज चोरीचा गुन्हा दाखल करून स्वतःची कातडी वाचण्याचा प्रयत्न केला आहे. यापूर्वी देखील प्रोफेसर कॉलनी चौकात विजेचे तार खुली असल्याने कमानीवर फ्लेक्स लावण्यासाठी चढलेल्या एका युवकाचा विजेचा धक्का लागून मृत्यू झाला होता. त्यावेळेस देखील एम.एस.ई.बी.ने वेळकाढूपणाचे धोरण घेतल्याचे निवेदनात म्हंटले आहे.
कुठल्याही दबावला बळी न पडता बालकाच्या अपघाती मृत्यूचा योग्य तपास करण्याची मागणी शीख, पंजाबी, सिंधी समाजाच्या शिष्टमंडळाने केली आहे. यावेळी हरजीतसिंह वधवा, जनक आहुजा, प्रितपालसिंह धुप्पड, प्रदीप पंजाबी, राकेश गुप्ता, राजेंद्र कंत्रोड, सतीश गंभीर, संजय आहुजा, राहुल बजाज, राजा नारंग, प्रशांट मुनोत, अंगद मदान, मनोज मदान, देवेंद्र मदान, अभिलाषा मदान, तुषार पोटे, मन्नू कुकरेजा, लिमराज पाटील, दलजीतसिंह वधवा आदी उपस्थित होते.
