विद्यार्थ्यांचे मानसिक व शारीरिक स्वास्थ्य मैदानी खेळातून साधले जाते -प्रा. माणिक विधाते
अहमदनगर (प्रतिनिधी)- मैदानी खेळातून विद्यार्थ्यांचा विकास साधला जातो. मुलांच्या सर्वांगीन विकासासाठी क्रीडा स्पर्धा महत्त्वाच्या ठरतात. विद्यार्थ्यांचे मानसिक व शारीरिक स्वास्थ्य मैदानी खेळातून साधले जाते. स्वास्थ्य चांगले असल्यास विविध क्षेत्रात नैपुण्य मिळवता येते. यासाठी मोबाईलमध्ये गुंतलेल्या मुलांना मैदानाकडे घेऊन जाण्यासाठी पालकांनी देखील जागरुक होण्याची गरज असल्याचे प्रतिपादन राष्ट्रवादीचे शहर जिल्हाध्यक्ष प्रा. माणिक विधाते यांनी केले.
मुकुंदनगर येथील पी.ए. इनामदार स्कूलमध्ये झालेल्या वार्षिक क्रीडा मेळाव्याच्या बक्षिस वितरणप्रसंगी प्रा. विधाते बोलत होते.
यावेळी राष्ट्रवादी अल्पसंख्यांक विभागाचे शहर उपाध्यक्ष अब्दुल रऊफ खोकर, प्राचार्य हारुन खान, उपप्राचार्या फरहाना शेख प्रमुख पाहुणे म्हणून उपस्थित होते.
प्राचार्य हारुन खान म्हणाले की, खेळाडूवृत्ती अंगीकारणारा विद्यार्थी जीवनात यशस्वी होतो. मिळालेला विजयाने हुरळून न जाता आनखी पुढे जाण्याची प्रेरणा मिळते. तर पराजय झाल्यास अजून जिद्दीने विजय प्राप्तीसाठी जिद्द निर्माण होत असते. जीवनातील नव-नवीन आव्हानांचा सामना करण्याचे बळ खेळाडूवृत्तीने निर्माण होत असल्याचे त्यांनी स्पष्ट केले.
शाळेत झालेल्या खो-खो, कबड्डी, धावणे, हॉलीबॉल, डॉजबॉल, रिले आदी विविध सांघिक व वैयक्तिक क्रीडा स्पर्धेचे बक्षीस वितरण उपस्थित पाहुण्यांच्या हस्ते करण्यात आले. या स्पर्धेत मोठ्या संख्येने शालेय खेळाडूंनी सहभाग नोंदवला होता. कार्यक्रम यशस्वी करण्यासाठी शालेय शिक्षक व शिक्षकेतरांनी परिश्रम घेतले.
