ड्युटी रजिस्टर नक्कल, ड्युटी बटवडा तक्ता व रात्र गस्तीची चौकशी करण्याची अन्याय निवारण निर्मूलन सेवा समितीची मागणी
अर्थपूर्ण संबंध प्रस्थापित करण्यासाठी पिडीत तक्रारदारांना धमकावणे व मारहाण होत असल्याचा आरोप
अहमदनगर (प्रतिनिधी)- पारनेर तालुक्यातील पोलीस अधिकारी व त्याचे काही पोलीस कर्मचारी पिडीत तक्रारदारांवर कुठल्याही प्रकारचे गंभीर गुन्हे नोंद नसताना रात्री-अपरात्री त्यांच्या घरी जावून मारहाण करणे, त्यांना उचलून पोलीस स्टेशनला आणने व धमकावून अर्थपूर्ण संबंध प्रस्थापित करण्यासाठी सुरु असलेल्या पिळवणुकीविरोधात अन्याय निवारण निर्मूलन सेवा समितीच्या वतीने जिल्हा पोलीस अधीक्षक कार्यालया समोर गुरुवारी (दि.23 फेब्रुवारी) उपोषण करण्यात आले.
यावेळी उपोषणकर्त्यांनी तक्रारदाराच्या निहाय पोलीस निरीक्षक व त्यांचे कर्मचारी यांची ड्युटी बटवाडा व रजिस्टर नक्कल, पोलीस निरीक्षक रात्र गस्तीची दप्तर चौकशी, त्यांचे मोबाईल लोकेशन व मोबाईलची सीडीआर तक्रारीनुसार तपासणी करण्याची मागणी केली आहे. या उपोषणात जिल्हाध्यक्ष अरुण रोडे, पारनेर तालुकाध्यक्ष निवृत्ती कासुटे, प्रशांत ठुबे, बबन बर्डे, शमसुद्दिन सय्यद, पांडुरंग धरम, रतन खत्री, अंकुश धुळे, योगेश कुलथे, रवी रासकर आदी सहभागी झाले होते.
पारनेर पोलीस स्टेशनचे पोलीस निरीक्षक व त्यांच्या काही सहकारी कर्मचार्यांनी कुठलाही गुन्हा नोंद नसताना माजी सैनिक प्रशांत ठुबे (रा. बाबुर्डी), बबन बर्डे (रा. वनकुटे) व समशुद्दीन सय्यद (रा. पोखरी) यांना जाणीवपूर्वक अर्थपूर्ण संबंध प्रस्थापित करण्यासाठी मनमानी पद्धतीने मारहाण करून पोलीस स्टेशनला आणले असल्याचा आरोप संघटनेच्या वतीने करण्यात आला आहे.
याबाबत पत्र व्यवहार करून संबंधितांवर कुठलीही कार्यवाही पोलीस विभागाच्या वतीने करण्यात आलेली नाही. तक्रार करत असल्याने संबंधित पोलीस निरीक्षक व त्यांचे कर्मचारी तक्रारदारांवर दबाव आणत आहे. जोपर्यंत चौकशी पूर्ण होत नाही, तोपर्यंत संबंधित पोलीस निरीक्षकाची बदली मुख्यालयात करण्याचे निवेदनात म्हंटले आहे.