नियमांची पायमल्ली करुन सर्व कामे निकृष्ट झाल्याचा आरोप
विभागीय चौकशी समिती नेमून दोषींवर गुन्हे दाखल करण्याची अन्याय निवारण निर्मूलन सेवा समितीची मागणी
अहमदनगर (प्रतिनिधी)- प्रत्यक्ष कामे व कागदपत्रमध्ये मोठ्या प्रमाणात असलेली तफावत, कामाचा निकृष्ट दर्जा, शासन परिपत्रक आणि नियमांची पायमल्ली करुन पारनेर तालुक्यात चौदाव्या व पंधराव्या वित्त आयोग, तसेच दलित वस्ती सुधार योजनेअंतर्गत कामे झाली असल्याचा आरोप अन्याय निवारण निर्मूलन सेवा समितीच्या वतीने करण्यात आला आहे. या प्रकरणी विभागीय चौकशी समिती नेमून चौकशी व्हावी व दोषींवर गुन्हे दाखल करण्याची मागणी संघटनेचे जिल्हाध्यक्ष अरुण रोडे व पारनेर तालुकाध्यक्ष निवृत्ती कासुटे यांनी जिल्हाधिकारी यांच्याकडे निवेदनाद्वारे केली आहे.
पारनेर तालुक्यातील पंचायत समिती अंतर्गत चौदावा व पंधरावा वित्त आयोग आणि दलित वस्ती सुधार योजनेअंतर्गत मोठ्या प्रमाणात अनियमितता झाली आहे. प्रत्यक्ष कामे व कागदपत्रमध्ये सुद्धा मोठ्या प्रमाणात तफावत असून, कुठलेही काम हे शासन परिपत्रकानुसार झालेले नाही. सर्व कामांमध्ये शासन परिपत्रकातील नियम व अटींची पायमल्ली झाली आहे. सदरील कामे अतिशय निकृष्ट दर्जाची झाली आहे. ग्रामपंचायत अंतर्गत कामे फक्त कागदोपत्री दाखवून निधी काढून घेतला गेला आहे. अर्थपूर्ण संबंधामुळे ही निकृष्ट कामे झाली असल्याचा आरोप संघटनेच्या वतीने करण्यात आला आहे.
सदरील कामामध्ये वापरले जाणारे सिमेंट, स्टील, खडी इत्यादी साहित्य हे प्लॅन इस्टिमेट मध्ये वेगळे दाखवून प्रत्यक्षात मात्र अतिशय निकृष्ट दर्जाचे वापरले गेले. त्यामुळे क्वॉलिटी कंट्रोल यांचे रिपोर्ट फक्त कागदपत्री दाखवून प्रत्यक्ष कामे मात्र अतिशय निकृष्ट दर्जाची झाली असल्याचे निवेदनात म्हंटले आहे. पारनेर तालुक्यातील पंधराव्या व चौदाव्या वित्त आयोग, तसेच दलित वस्ती सुधार योजनेअंतर्गत कामाची तपासणी विभागीय समिती नेमणूक करुन चौकशी व्हावी, शासकीय निधीचा गैरवापर केल्याप्रकरणी दोषींवर गुन्हे दाखल करण्याची मागणी अन्याय निवारण निर्मूलन सेवा समितीच्या वतीने करण्यात आली आहे.
