सार्वजनिक वाहतूक व्यवस्था पुरेश्या प्रमाणात उपलब्ध करण्याची मागणी
भारतीय कम्युनिस्ट पक्षाची राज्य सरकारकडे मागणी
अहमदनगर (प्रतिनिधी)- दिवाळी सणाच्या सुट्टीत प्रवाश्यांची होणारी आर्थिक लुट आणि ससेहोलपट थांबवून, सार्वजनिक वाहतूक व्यवस्था पुरेश्या प्रमाणात उपलब्ध करण्याची मागणी भारतीय कम्युनिस्ट पक्षाच्या वतीने करण्यात आली आहे. भाकपचे राज्य सचिव कॉ. सुभाष लांडे यांनी या मागणीचे निवेदन मुख्यमंत्री एकनाथ शिंदे यांना पक्षाच्या वतीने पाठविले आहे.
महाराष्ट्र राज्य हे वेगाने नागरीकरण होणारे राज्य आहे. सुमारे 52 टक्के शहरी लोकवस्ती असून, दिवाळी, पाडवा व भाऊबीज सारख्या सणाच्या वेळी नागरिक मोठ्या संख्येने आपल्या गावी जात असतात. शाळा, महाविद्यालयांना सुट्टी असल्याने संपूर्ण कुटुंबासह गावाकडे जाणार्‍या व परतणार्‍या प्रवाश्यांची संख्या खूप मोठी असते. या प्रवाश्यांची लुट हाच खाजगीकरणाचा धंदा आहे. त्याबद्दल मोठा मनःस्ताप जनतेला सोसावा लागतो; परंतु त्यावर राज्य सरकारच्या यंत्रणा डोळेझाक करत असल्याचा आरोप भाकपच्या वतीने करण्यात आला आहे.
प्रदूषण आणि उर्जाबचत यासाठी स्वस्त, सार्वजनिक वाहतूक व्यवस्था अत्यंत आवश्यक आहे. नागरिकांना स्वस्त व सुलभ प्रवासी सेवा उपलब्ध करून देणे सरकारचे कर्तव्य आहे. रेल्वे या महत्वाच्या सार्वजनिक उपक्रमाचे धोरण जनताकेंद्री असण्याऐवजी कंत्राटदार केन्द्री बनली आहे. कोणत्याही रेल्वे रूट व एक्स्प्रेस गाडीत एकही सर्वसाधारण बोगी ठेवलेली नाही. कोरोनानंतर अनेक सुविधा रेल्वे प्रशासनाने कायमच्या बंद केल्या आहेत. स्लीपर बोगी संख्या घटविली आहे. व्हेकेशन स्पेशल ट्रेन अद्याप जाहीर केल्या नसून, सामान्य तिकीट विक्री अनेक ठिकाणी बंद आहे. एमएसआरटीसी एसटी आणि ट्रॅव्हल बसेस उदारीकरण व खाजगीकरण धोरणामुळे एसटी बस व्यवस्था विस्कळीत होत आहे. कोरोनाचा फायदा घेत फायदा घेत अनेक मार्गावरील बस सेवा बंद केल्या आहेत, त्या पूर्ववत केलेल्या नाहीत. सणासुदीच्या काळासाठी कोणतीही नवी सुविधा व बसेस संख्या यात वाढ नाही. खाजगी आणि एसटी दोन्ही प्रकारच्या प्रवाशी दरात सणासुदीच्या काळात मोठी वाढ केली जाते. सामान्य कुटुंबाला दूर अंतरावरील प्रवास करण्यासाठी महिन्याचा पगार खर्ची पडेल इतका महाग प्रवास बनला असल्याचे निवेदनात म्हंटले आहे.
सर्व रेल्वे गाड्यात किमान 5 सर्वसाधारण बोगी आणि 10 स्लीपर बोगी ठेवाव्या, दिवाळी स्पेशल ट्रेन (किमान 21 बोगीची) तत्काळ नियमित सुरु करावी, कोरोना काळात वाढविलेले दर तत्काळ कमी करावे, सर्वसाधारण प्रवासी आरक्षणाचा कोटा वाढवावा, तिकीट खिडक्यांची संख्या वाढवावी, नविन एसटी बसेस संख्या वाढविण्यात याव्या, महत्वाच्या मार्गावर फेर्‍या तत्काळ सुरु कराव्या, ऐनवेळी प्रवाश्यांच्या मागणीनुसार बस सोडण्याची तरतूद अमलात आणावी, सणासुदीच्या काळात भाडेवाढ करणे बंद करावे, खाजगी बसेसच्या माफिया प्रकाराला निर्बंध घालावा, खाजगी बसेसच्या अनिर्बंध दरावर निर्बंध घालावे आदी मागण्यांचा समावेश आहे. यासाठी विविध जनसंघटनांचे, राजकीय पक्षांचे, प्रवासी संघटनांचे प्रतिनिधी यांच्या बरोबर समन्वय साधण्याचे म्हंटले आहे.
