पीपल्स हेल्पलाईन व भारतीय जनसंसदेचा पुढाकार
सर्वसामान्यांच्या पदरात आर्थिक, सामाजिक न्याय मिळवून देण्यासाठीचा प्रयत्न -अ‍ॅड. कारभारी गवळी
अहमदनगर (प्रतिनिधी)- समाजातील लोक कर्कासूर आणि न्याय कर्कासूरांना कायमचे संपविण्यासाठी पीपल्स हेल्पलाईन व भारतीय जनसंसदेने सर्वसामान्य नागरिकांना लोकशाही गितास्त्र देण्याचा निर्णय घेतला आहे. भारतीय संविधानाबरोबरच गीतेतील तत्वज्ञान उन्नत चेतनेच्या आधारे प्रत्यक्ष रितीने राबविण्यासाठी हा प्रयत्न असल्याची माहिती अ‍ॅड. कारभारी गवळी यांनी दिली.
देशात कायदा राबवितांना आणि न्याय देतांना दोन्ही ठिकाणी भ्रष्टाचार, टोलवाटोलवी आणि अनागोंदी निर्माण झाली. त्यातून सामान्य माणसाला स्वातंत्र्याची फळे मिळाली नाहीत. लोककर्कासूर आणि न्याय कर्कासूरांमुळे सर्वसामान्य व्यक्तीला वंचित राहण्याची वेळ आली आहे.
या कर्कासूरांना संपविण्यासाठी रक्तहिन डिच्चूकावा करण्याशिवाय पर्याय नाही. गितेमधील तत्वज्ञान प्रत्यक्ष वापरल्याशिवाय लोककर्कासूर आणि न्यायकर्कासूरांना संपविता येणार नाही. त्यामुळे निवडणुकीच्या माध्यमातून समाज कंटकांना दूर ठेवता येणार आहे. न्याय संस्थेमध्ये सर्वत्र परसलेल्या न्याय कर्कासूरांना संपविण्याचे कार्य केले जाणार असल्याचे संघटनेच्या वतीने स्पष्ट करण्यात आले आहे.
28 जानेवारीच्या चांदबिबी महालावर आयोजित केलेल्या लोक कर्कासूर आणि न्याय कर्कासूर कडेलोट कार्यक्रमात या देशातील तमाम जनतेला लोकशाही गितास्त्र प्रदान करण्यात येणार आहे. गितेमधील सर्व तत्वज्ञानाचा वापर महात्मा गांधीनी सत्याग्रहासारखे नवे शस्त्र देऊन इंग्रजांना या देशातून जाण्यास भाग पाडले. त्याचप्रकारे सार्वजनिक जीवनातून लोक कर्कासूरांना दूर करण्यासाठी नागरिकांना लोकशाही गितास्त्र देण्याचा निर्णय घेण्यात आला.
स्वातंत्र्य अधिक विकसित करण्यासाठी आणि सामान्य माणसाच्या पदरात आर्थिक, सामाजिक न्याय मिळवून देण्यासाठी रक्तहिन डिच्चू कावा करण्याशिवाय पर्याय नाही. हा डिच्चू कावा यशस्वी करण्यासाठी गितेमधील शिकवणूक म्हणजेच एक प्रकारचे अस्त्र असून, त्याचा उपयोग केला जाणार असल्याचे अ‍ॅड. कारभारी गवळी यांनी म्हंटले आहे. यासाठी अ‍ॅड. गवळी, अशोक सब्बन, प्रकाश थोरात, सुधीर भद्रे, शाहीर कान्हू सुंबे, विठ्ठल सुरम, डॉ. मेहबुब सय्यद, अर्शद शेख, कैलास पठारे आदी प्रयत्नशील आहेत.