रस्त्याची दुरुस्ती न झाल्यास सुपा येथील टोल नाका बंद पाडण्याचा इशारा
अहमदनगर (प्रतिनिधी)- अपघाताला कारणीभूत ठरणारे अहमदनगर ते शिरूर दरम्यानचे खड्डेमय रस्त्यांची त्वरीत दुरुस्ती करावी, अन्यथा तो पर्यंत सुपा येथील टोल वसुली बंद ठेवण्याची मागणी रिपब्लिकन पार्टी ऑफ इंडिया (आठवले) मराठी आघाडीचे प्रदेश संघटक सिध्दार्थ सिसोदे यांनी केली आहे. तर खड्डेमय रस्ते, दिशादर्शक फलक नसणे व महामार्गावर पट्टे नसल्याची तक्रार त्यांनी जिल्हाधिकारी व सार्वजनिक बांधकाम विभागाकडे केली आहे. याप्रकरणी दखल न घेतल्यास टोलनाका बंद पाडण्याचा इशारा देण्यात आला आहे.
महाराष्ट्रातील रहदारीचा महत्वाचा महामार्ग असलेल्या औरंगाबाद-अहमदनगर-पुणे महामार्गावरील अहमदनगर ते शिरुर दरम्यान मोठ्या प्रमाणात पावसाने रस्त्यावर खड्डे पडले आहेत. या महामार्गावर प्रवासी व मालवाहू वाहनांना निकृष्ट सेवा देऊन देखील सुपा येथे चेतक एन्टरप्रायजेस लिमिटेड या कंपनीच्या माध्यमातून टोल वसुली सुरु आहे. सदर महामार्ग सुव्यवस्थित ठेवण्याच्या अटीवर राज्य शासनाने ही टोल वसुलीचा अधिकार सदर कंपनीला दिला आहे. परंतु कंपनी मालवाहतूक गाड्यांचा व प्रवाश्यांच्या सुविधेचा कोणताही विचार करत नसल्याचा आरोप रिपाई मराठा आघाडीच्या वतीने करण्यात आला आहे.
खड्डेमय रस्त्यांमुळे मालवाहतूक गाड्या व प्रवाशांच्या वाहनांचे मोठे नुकसान होऊन मोठा त्रास सहन करावा लागत आहे. अनेक ठिकाणी महामार्गावर दिशादर्शक फलक नाही, रस्त्यावर पट्टे मारण्यात आलेले नसल्याने अपघात होऊन जीवित व वित्तहानी होण्याची दाट शक्यता आहे. अशा परिस्थितीमध्ये अपघात होऊन एखाद्याचा जीव गेल्यास संबंधित कंपनीवर सदोष मनुष्यवधाचा गुन्हा दाखल करण्याचे निवेदनात म्हटले आहे. अहमदनगर ते शिरुर दरम्यान महामार्गावरील खड्डेमय रस्त्याची त्वरीत दुरुस्ती करावी, अन्यथा टोल वसूली थांबविण्याची मागणी रिपाई मराठा आघाडीच्या वतीने करण्यात आली आहे.