जय हिंद फाऊंडेशन व एस.बी.आय.चा वृक्षरोपणासाठी पुढाकार
वृक्षांमुळे गडाच्या वैभवात भर पडणार -सरपंच राजू नेटके
अहमदनगर (प्रतिनिधी)- जिल्ह्यातील उजाड डोंगररांगा व माळरान हिरावाईने फुलविण्याच्या उद्देशाने कार्यरत असलेल्या जय हिंद फाऊंडेशन व क्षेत्रीय प्रबंधक कार्यालय एस.बी.आय. अहमदनगर यांच्या वतीने कोल्हार (ता. पाथर्डी) येथील कोल्हुबाई माता गडाच्या पायथ्याशी 1 हजार झाडांची लागवड करण्यात आली.
या वृक्षलागवडची सुरुवात वृक्षरोपणाने करण्यात आली. यावेळी कोल्हार गावचे सरपंच राजू नेटके, जेष्ठ मार्गदर्शक महादेव पालवे, गुरुजी सोपानराव पालवे, पोलीस निरीक्षक शंकर डमाळे, संदिप पालवे, ईश्‍वर पालवे, किशोर पालवे, जय हिंदचे शिवाजी पालवे, शिवाजी गर्जे, भाऊसाहेब पालवे, चंदु नेटके, सुनील डमाळे, अक्षय पालवे, विकास पालवे, शैलेश पालवे, मयूर गर्जे, मेजर अशोक जावळे, चंदू पालवे, जय भगवान महासंघाचे मदन पालवे, विजय पालवे, बाळासाहेब जावळे, रामदास देशमुख, बाबासाहेब जाधव, अशोक गर्जे, महादेव पालवे आदी उपस्थित होते.
शिवाजी पालवे म्हणाले की, जिल्ह्यातील गड व डोंगरांगाना निसर्गाचे वैभव प्राप्त करुन देण्यासाठी वृक्षलागवड सुरु आहे. कोल्हार या ठिकाणी भविष्यात फळ झाडामुळे पक्षी, प्राणी व मनुष्यांना लाभ मिळणार आहे. तर पर्यावरणाचा प्रश्‍न देखील सुटण्यास मदत होणार असल्याची भावना त्यांनी व्यक्त केली. सरपंच राजू नेटके म्हणाले की, वृक्ष लागवड व संवर्धन काळाची गरज बनली आहे. वृक्षांमुळे गडाच्या वैभवात भर पडणार असून, भाविकांना देखील याची सावली मिळणार असल्याचे त्यांनी सांगितले.
यावेळी आवळा, सीताफळ, चिंच, लिंब, करंज, जांभूळ आदी देशी फळझाडांची लागवड करण्यात आली. लावण्यात आलेल्या झाडांची लागवड जय हिंद फाऊंडेशनच्या माध्यमातून केली जाणार आहे.
माजी सैनिक व बँकिंग क्षेत्रात काम करत असताना एस.बी.आय. ने सामाजिक कार्यात लावलेल्या हातभाराचे ग्रामस्थांनी कौतुक करुन आभार मानले.