पहायला मिळाली भारतीय सैन्याची बलाढ्य शक्ती व चित्त थरारक प्रात्यक्षिके
अहमदनगर (प्रतिनिधी)- अचूक निशाण्यावर धडाडणारे रणगाडे….बरसणारे तोफगोळे… बंदुकीतून निघणार्या शेकडो गोळ्या … बॉम्बचा वर्षाव…धुरांचे लोट… असा युद्ध भूमीवरचा थरार अहमदनगर जवळील के. के. रेंज येथे लष्कराच्या प्रात्यक्षिकांमध्ये पाहायला मिळाला. सैनिकांचा जोश व लष्कराचे शिस्तबद्ध नियोजनाने उपस्थित प्रेक्षक व नागरिक भारावले.
के. के. रेंज या लष्कराच्या युद्ध सराव भूमीवर शनिवारी (दि. 28) नेपाळ व निमंत्रित मित्र राष्ट्राच्या सैन्यांसमोर भारतीय लष्कराने युद्ध सरावाची प्रात्यक्षिके दाखविली. भारतीय सैन्याच्या प्रमुख प्रशिक्षण संस्था असलेल्या आर्मड कॉर्प्स सेंटर व स्कूल, मॅकेनाइज्ड इन्फंट्री सेंटर यांच्या वतीने मेजर जनरल अनिलराज सिंग काहलो यांच्या मार्गदर्शनाखाली हे युद्ध सराव प्रात्यक्षिक घेण्यात आले.
रणगाड्यांवरून तोफांचा मारा, बॉम्ब वर्षाव करण्यात आला. या युद्ध सरावात ड्रोनच्या मदतीने शत्रूवर पाळत ठेवून शत्रूला एका सेकंदात निष्प्रभ करण्यच्या लष्कराच्या क्षमतेचे प्रदर्शन दाखविण्यात आले. रणगाड्यांमधून आगीचे लोळ सोडत काही क्षणात शत्रूला भस्मसात करणार्या तोफांचा मारा करण्यात आला. अर्जुन, भीष्म, अजय, टी-90, टी-72, बीएमपी-2 या अत्याधुनिक तंत्रप्रणाली असणार्या रणगाड्यांमधून अचूक मारा शत्रूचे कर्दनकाळ ठरले.
या रणगाड्यांमध्ये धूर निर्माण करण्याची अतिउच्च क्षमता असून, त्यामुळे धोक्याच्या परिस्थितीत शत्रूला हुलकावणी देऊन पुन्हा तीव्र हल्ला चढविण्याचे सामर्थ्य प्रात्यक्षिकात दाखविण्यात आले. या प्रात्यक्षिकांनंतर उपस्थितांना जवळून रणगाडे, अत्याधुनिक शस्त्रास्त्रेचे प्रदर्शन पाहिले.