बदली झालेल्या पारनेर पोलीस अधिकारीवर नागरिकांच्या पिळवणुकप्रकरणी कारवाई करावी
तर सैनिक बँकेच्या चेअरमन व आधिकार्‍यांवर गुन्हा दाखल करण्याची मागणी
अहमदनगर (प्रतिनिधी)- नुकतेच बदली झालेले पारनेर पोलीस स्टेशनचे पोलीस निरीक्षक व त्याचे काही पोलीस कर्मचारी पिडीत तक्रारदारांवर कुठल्याही प्रकारचे गंभीर गुन्हे नोंद नसताना रात्री-अपरात्री त्यांच्या घरी जावून मारहाण करणे, त्यांना उचलून पोलीस स्टेशनला आणने व धमकावून अर्थपूर्ण संबंध प्रस्थापित करण्यासाठी केलेल्या पिळवणुकीप्रकरणी कारवाई करावी व पारनेर तालुका सैनिक सहकारी बँकेच्या कर्जत शाखेत चेक क्लिअरिंग मध्ये अफरातफर करून पावणे दोन कोटी रुपयाचां घोटाळा चेअरमन, मुख्यकार्यकारी अधिकारी व शाखाअधिकारी यांच्या सहभागातून झाला असून, जबाबदार असणार्‍या सैनिक बँकेच्या आधिकारी आणि चेअरमन यांच्यावर गुन्हे दाखल करण्याच्या मागणीसाठी अन्याय निवारण निर्मूलन सेवा समितीच्या वतीने सोमवारी (दि.6 मार्च) जिल्हा पोलीस अधीक्षक कार्यालया समोर बेमुदत उपोषण करण्यात आले.
या उपोषणात समितीचे जिल्हाध्यक्ष अरुण रोडे, पारनेर तालुकाध्यक्ष पप्पू कासुटे, पुरुषोत्तम शहाणे, विनायक गोस्वामी, प्रशांत ठुबे, बबन बर्डे, शमसुद्दिन सय्यद, पांडुरंग धरम, रतन खत्री, कोकाटे आदी सहभागी झाले होते. तक्रारदाराच्या निहाय पोलीस निरीक्षक व त्यांचे कर्मचारी यांची ड्युटी बटवाडा व रजिस्टर नक्कल, पोलीस निरीक्षक रात्र गस्तीची दप्तर चौकशी, त्यांचे मोबाईल लोकेशन व मोबाईलची सीडीआर तक्रारीनुसार तपासणी करावी, सैनिक सहकारी बँके प्रकरणात सहकार विभागाच्या आधिकार्‍यांनी फिर्यादी होऊन मुख्य सूत्रधार शाखाधिकारी सदाशिव फरांडे, मुख्य कार्यकारी अधिकारी व चेअरमन यांच्यावर गुन्हा दाखल करण्याची मागणी उपोषणकर्त्यांनी केली आहे.
पारनेर पोलीस स्टेशनचे पोलीस निरीक्षक व त्यांच्या काही सहकारी कर्मचार्यांनी कुठलाही गुन्हा नोंद नसताना माजी सैनिक प्रशांत ठुबे (रा. बाबुर्डी), बबन बर्डे (रा. वनकुटे) व समशुद्दीन सय्यद (रा. पोखरी) यांना जाणीवपूर्वक अर्थपूर्ण संबंध प्रस्थापित करण्यासाठी मनमानी पद्धतीने मारहाण करून पोलीस स्टेशनला आणले असल्याचा आरोप संघटनेच्या वतीने करण्यात आला आहे.
तर पारनेर तालुका सैनिक सहकारी बँकेच्या कर्जत शाखेत खातेदाराने तेथील आधिकारी, क्लार्कशी संगनमत करून चेक क्लिअरिंगमध्ये अफरातफर करत सुमारे पावणेदोन कोटी रुपयांचा अपहार केल्याचे समोर आले आहे. या प्रकरणी बँकेचे मुख्य कार्यकारी अधिकारी संजय कोरडे यांनी कर्जत पोलिस ठाण्यात फिर्याद दिली आहे. मात्र या चेक घोटाळा प्रकरणात शाखाअधिकारी सदाशिव फरांडे हा व त्याला पाठीशी घालणारे मुख्यकार्यकारी आधिकारी संजय कोरडे व चेअरमन शिवाजी तुकाराम व्यवहारे यांना जबाबदार धरण्यात आल्याचा अहवाल सहकार विभागाचे पारनेरचे सहाय्यक उपनिबंधक गणेश औटी यांनी दिला असताना संबंधितांवर गुन्हे दाखल करण्याची मागणी उपोषणकर्त्यांनी लावून धरली आहे.