• Mon. Dec 1st, 2025

सामाजिक कार्यकर्ते साहेबराव काते यांना महात्मा फुले जीवन गौरव पुरस्कार

ByMirror

Jan 16, 2023

मागासवर्गीय समाजाच्या विकासात्मक कार्यात योगदान दिल्याचा सन्मान

अहमदनगर (प्रतिनिधी)- शहरातील सामाजिक कार्यकर्ते साहेबराव शंकर काते यांना श्री नवनाथ युवा मंडळाच्या वतीने राज्यस्तरीय महात्मा फुले जीवन गौरव पुरस्काराने सन्मानित करण्यात आले. जिल्हा परिषद सदस्य माधवराव लामखडे यांच्या हस्ते काते यांना पुरस्कार देण्यात आला.

साहेबराव काते

निमगाव वाघा (ता. नगर) येथे झालेल्या स्वामी विवेकानंद व राजमाता जिजाऊ जयंती तसेच राष्ट्रीय युवा सप्ताह निमित्त हा पुरस्कार प्रदान सोहळा पार पडला. यावेळी डोंगरे संस्थेचे अध्यक्ष तथा ग्रामपंचायत सदस्य पै. नाना डोंगरे, डॉ. विजय जाधव, भरत बोडखे, उद्योजक दिलावर शेख, युवा मंडळाचे अध्यक्ष संदीप डोंगरे आदी उपस्थित होते.

साहेबराव काते भाजपाचे अनुसूचित जाती मोर्चा शहर जिल्हा उपाध्यक्ष व भारतीय लहुजी सेनेचे जिल्हा संपर्क प्रमुख आहेत. विविध राजकीय व सामाजिक संघटनेच्या माध्यमातून काते मागासवर्गीय समाजाच्या विकासात्मक कार्यात मागील 23 वर्षापासून योगदान देत आहे. त्यांनी अनेक आंदोलने, चळवळ विविध सामाजिक विषयांवर समाजातील प्रश्‍न मांडून, सदर प्रश्‍न सोडविण्याचे काम केले आहे. तसेच मागासवर्गीय समाजातील गरजू कुटुंबातील व्यक्तींना जातीचे दाखले, वैद्यकिय मदत, विधवा महिलांना पेन्शन मिळवून देणे, रेशन कार्ड, महामंडळाचे कर्ज मिळण्यासाठी पाठपुरावा केला.

शासनाच्या कल्याणकारी योजनांचा लाभ शेवटच्या घटकापर्यंत गरजू लाभार्थ्यांना मिळवून देण्याचे कार्य ते करत आहे. कोरोना महामारीच्या संकटकाळात सामाजिक भावनेने विविध उपक्रम राबवून, गरजू घटकांना आधार देण्याचे कार्य त्यांनी केले. तर मागासवर्गीयांचे कर्ज माफ होण्यासाठी केंद्र व राज्य सरकारकडे ते पाठपुरावा करीत असून, सदर मागणीसाठी मुंबईच्या आझाद मैदानात झालेल्या आंदोलनात सक्रीय सहभागी झाले होते. या सामाजिक कार्याची दखल घेऊन त्यांना महात्मा फुले जीवन गौरव देण्यात आला आहे.


समाजाच्या विकासासाठी नेहमीच आपण कटिबध्द राहून कार्य सुरु ठेवले आहे. मागासवर्गीयांची कोरोनानंतर आर्थिक परिस्थिती बिकट बनली असून, विविध महामंडळाकडून मागासवर्गीय समाजबांधवांनी घेतलेले कर्ज माफ करण्याची मागणी केंद्र व राज्य सरकारकडे सातत्याने सुरु असल्याची भावना काते यांनी व्यक्त केली. पुरस्कार मिळाल्याबद्दल त्यांचे सर्वत्र अभिनंदन होत आहे.

Leave a Reply

Your email address will not be published. Required fields are marked *