कर्करोग तपासणी आणि विविध तपासणी शिबिराला महिलांचा उत्स्फुर्त प्रतिसाद
महिलांच्या बदलत्या जीवनशैलीने ब्रेस्ट कॅन्सरमध्ये वाढ -डॉ. तेजश्री जुनागडे
अहमदनगर (प्रतिनिधी)- महिलांची बदलती जीवनशैली, व्यायामाचा अभाव, तणाव व चुकीची आहार पध्दतीमुळे ब्रेस्ट कॅन्सरचे प्रमाण वाढत आहे. काही कॅन्सर शस्त्रक्रियेने तर काही औषधाने बरा होतो. ब्रेस्टमध्ये असलेल्या गाठिचे विविध प्रकार असून, पुरुषांमध्येही ब्रेस्ट कॅन्सर आढळून येत असल्याचे प्रतिपादन ब्रेस्ट सर्जन तज्ञ डॉ. तेजश्री जुनागडे यांनी केले.
लायन्स क्लब ऑफ अहमदनगर, अहमदनगर मिलेनियम, सेवाप्रीत व लिओ क्लब ऑफ अहमदनगर यांच्या संयुक्त विद्यमाने महिलांसाठी कर्करोग तपासणी आणि विविध तपासणी शिबिर घेण्यात आले. या शिबीराच्या उद्घाटनाप्रसंगी डॉ. जुनागडे बोलत होत्या. यावेळी डॉ. दत्तात्रय अंधुरे, झोन चेअरमन आनंद बोरा, डॉ. अमित बडवे, मराठी पत्रकार परिषदेचे विभागीय सचिव मन्सूर शेख, सेवाप्रीतच्या अध्यक्षा जागृती ओबेरॉय, लायन्स क्लबच्या अध्यक्षा तथा स्त्री रोग तज्ञ डॉ. सिमरन कौर वधवा, सचिव प्रणिता भंडारी, महेश पाटील, प्रिया मुनोत, राजू गुरुनानी आदी उपस्थित होते.
पुढे बोलताना डॉ. जुनागडे म्हणाल्या की, अद्यावत तंत्रज्ञानामुळे ब्रेस्ट वाचवून देखील कॅन्सरचे ऑपरेशन केले जातात. केमेथेरपीचे दुष्परिणाम कमी झाले असून, कॅन्सरचे निदान लवकर झाल्यास गुणकारी औषध व अद्यावत शस्त्रक्रियांमुळे रुग्ण पूर्णत: बरा होतो. कॅन्सर म्हणजे मृत्यू नव्हे, ही भीती घालवण्यासाठी जनजागृती आवश्यक आहे. वयाच्या चाळीस वर्षानंतर वर्षातून एकदा स्क्रीनिंग मेमोग्राफी करण्याचे त्यांनी आवाहन केले.
डॉ. दत्तात्रय अंधुरे म्हणाले की, कॅन्सरने घाबरण्याची गरज नसून,योग्य वेळी उपचार व तपासणी आवश्यक आहे. कॅन्सर प्रथम अवस्थेत तपासल्यास रुग्ण बरे होतात. मात्र भीतीपोटी लोक तपासण्या करत नसल्याने मृत्यूकडे ओढले जातात. हा आजार संसर्गजन्य नसून, लाईफस्टाईलमुळे निर्माण होणारा आजार आहे. अनुवंशिकतेनुसारही काही प्रमाणात रुग्ण आढळतात. सध्या लठ्ठपणामुळे कॅन्सरचा धोका वाढत आहे. शरीराला आवश्यक अन्न घटकाची कमतरतेने देखील कॅन्सर होत असल्याचे स्पष्ट केले. तर कॅन्सरला न घाबरता लढा देऊन त्यावर मात करण्याचे आवाहन त्यांनी केले.
जागृती ओबेरॉय यांनी लाईफस्टाइल बिघडल्याने मनुष्य अनेक आजारांना बळी पडत आहे. चुकीची जीवनशैली बदलून आहार व व्यायामाकडे लक्ष देण्याचे त्यांनी आवाहन केले.
झेंडीगेट येथील डॉ. सिमरन वधवाज केअर अ‍ॅण्ड क्युअर सेंटर येथे हा शिबीर घेण्यात आला. यामध्ये महिलांचा उत्स्फुर्त प्रतिसाद लाभला. यामध्ये महिलांची तपासणी करुन, सीबीसी, थायरॉईड, बीएसएल रॅण्डम, बीएमडी, पीएपी आदी चाचण्या करण्यात आल्या. कार्यक्रमाचे सूत्रसंचालन दिप्ती सबलोक यांनी केले. आभार शेरी धुप्पड यांनी मानले. यावेळी लायन्स व सेवाप्रीतच्या सदस्या मोठ्या संख्येने उपस्थित होत्या.
