माथाडी निरीक्षक व सहाय्यक कामगार आयुक्त प्रकरण दडपण्याचा प्रयत्न करत असल्याचा आरोप
सह्याद्री छावा सामाजिक संघटनेचा उपोषणाचा इशारा
अहमदनगर (प्रतिनिधी)- माथाडी कामगार मंडळाच्या बनावट वाराई पुस्तक छपाई प्रकरण माथाडी निरीक्षक व सहाय्यक कामगार आयुक्त दडपण्याचा प्रयत्न सुरु असल्याचा आरोप करुन, या प्रकरणातील आरोपी व त्यांना पाठिशी घालणार्‍या अधिकार्‍यांवर गुन्हे दाखल करण्याची मागणी सह्याद्री छावा सामाजिक संघटनेच्या वतीने करण्यात आली आहे. संघटनेचे प्रदेश कार्याध्यक्ष रावसाहेब काळे यांनी या मागणीचे निवेदन व उपोषणचे पत्र मुख्यमंत्री एकनाथ शिंदे यांना पाठविले आहे.
शहरात माथाडी कामगार मंडळाच्या बनावट वाराई पुस्तक छपाई प्रकरण उघडकीस आले आहे. या प्रकरणातील प्रमुख सूत्रधार व टोळीप्रमुखाचे निलंबन करण्यात आले होते. मात्र पुन्हा त्याला कामावर रुजू करुन घेण्यात आले आहे. माथाडी निरीक्षक व सहाय्यक कामगार आयुक्त सदर प्रकरण दडपण्याचा प्रयत्न करीत आहे. या प्रश्‍नावर 21 नोव्हेंबर रोजी उपोषण करण्यात आले होते. दोन दिवासानंतर लेखी आश्‍वासन देऊन उपोषण मागे घेण्यात आले.
संबंधितांवर अद्यापि कारवाई करण्यात आलेली नाही. जाणीवपूर्वक आरोपीवर कारवाई करण्यास टाळाटाळ केली जात आहे. जिल्ह्यातकारखानदार धनदांडग्याशी हात मिळवणी करून कामगारांना त्यांच्या न्याय, हक्कापासून वंचीत ठेवण्यात येत आहे. खोटी कागदपत्रे छापून कामगार कायद्याने उल्लंघन करणार्‍यांवर कारवाई करण्याचे निवेदनात म्हंटले आहे.
जिल्हयामध्ये कामगार कायदयाचे उल्लंघन होत असून, कामगारांची नोंद ही अस्थापन विभागाकडे मालक, ठेकेदार, अद्ययावत नोंदी नाही. याकडे कामगार कार्यालयाचे संपूर्ण दुर्लक्ष झालेले आहे. कारखानदार, भांडवलदार यांच्याशी संगनमत करुन कामगार कायदयाची पायमल्ली होत असताना या प्रकरणाची वरिष्ठ स्तरावर चौकशी व्हावी, माथाडी कामगार मंडळाच्या बनावट वाराई पुस्तक छापाई प्रकरणामध्ये दोषींवर गुन्हे दाखल करण्याची मागणी सह्याद्री छावा सामाजिक संघटनेच्या वतीने करण्यात आली आहे. याप्रकरणी दखल न घेतल्यास 19 डिसेंबर पासून जिल्हाधिकारी कार्यालया समोर आमरण उपोषणाचा इशारा देण्यात आला आहे.
