मांजा विक्रेत्यांच्या दुकानासह गोडाऊनची धडक तपासणी मोहिम राबवा
राष्ट्रवादी अल्पसंख्यांक विभागाच्या शिष्टमंडळाने घेतली आयुक्तांची भेट
अहमदनगर (प्रतिनिधी)- शहरात सर्रास विक्री होत असलेल्या चायना मांजाच्या प्रश्‍नावर राष्ट्रवादी अल्पसंख्यांक विभागाच्या शिष्टमंडळाने मनपा आयुक्त डॉ. पंकज जावळे यांची भेट घेऊन, पर्यावरणाला हानीकारक असलेल्या व अनेकांचा बळी घेणार्‍या चायना तसेच नायलॉन मांजा विक्रीवर तातडीने कठोर कारवाई करण्याची मागणी केली. विशेष पथकाच्या माध्यमातून शहरातील मांजा विक्रेत्यांचे दुकानासह गोडाऊनची धडक तपासणी मोहिम राबविण्याबाबत यावेळी लक्ष वेधण्यात आले.
आयुक्त डॉ. जावळे यांनी या गंभीर प्रश्‍नावर स्वत: वैयक्तिक लक्ष घालून शहरात चायना मांजा बंदीची काटेकोर अंमलबजावणीसाठी प्रयत्न करणार असल्याचे आश्‍वासन त्यांनी शिष्टमंडळास दिले. यावेळी राष्ट्रवादी अल्पसंख्यांक विभागाचे शहर जिल्हाध्यक्ष साहेबान जहागीरदार, राष्ट्रवादीचे शहर जिल्हाध्यक्ष प्रा. माणिक विधाते, व्यापार व उद्योग सेलचे अनंत गारदे, ओबीसी सेलचे अमित खामकर, केडगाव अध्यक्ष भरत गारुडकर, गणेश बोरुडे, शहानवाज शेख, हनजला खान, ताज खान, वसिम शेख, शाहरुख शेख, जाकिर तांबोली, फैरोज पठाण, आनंद पुंड आदी उपस्थित होते.
मकर संक्रांतीला मोठ्या प्रमाणात सर्व समाजातील युवक पतंग उडवितात. पतंगबाजीच्या स्पर्धेत टिकण्यासाठी जीवघेण्या चायना (नायलॉन) मांजाचा सर्रास वापर होत आहे. या चायना मांजावर बंदी असली तरी अनेक दुकानदार त्याची छुप्या पध्दतीने विक्री करत आहेत. नायलॉन मांजाची शहरात विक्री होत असताना, मनपा प्रशासन याकडे डोळेझाक करत असल्याचा आरोप राष्ट्रवादी अल्पसंख्यांक विभागाच्या वतीने करण्यात आला आहे.
चायना मांजा लवकर तुटत नसल्याने काही वर्षांपासून अनेक नागरिकांचे गळे व हात कापले गेले आहेत. तर या मांज्यामुळे पशु-पक्ष्यांचे मोठ्या प्रमाणात बळी जावून त्यांचे असतित्व धोक्यात आले आहे. या जीवघेण्या चायना व नायलॉन मांजावर बंदी असताना देखील शहरात मोठा साठा विक्रीस आलेला असून, त्याची विक्री सर्रास सुरु आहे. प्रशासन दिखाव्यापुरती चायना मांजावर कारवाई करत आहे. मात्र पुर्णतः बंदीची अंमलबजावणी होताना दिसत नसल्याचे निवेदनात म्हंटले आहे.
मनुष्यासह पशुपक्ष्यांचे जीव घेणार्‍या चायना मांजावर सक्तीने बंदीची अंमलबजावणी करुन, विक्री करणार्‍यांवर कायदेशीर कारवाई करण्याची मागणी राष्ट्रवादी अल्पसंख्यांक विभागाच्या वतीने करण्यात आली आहे. याप्रकरणी कारवाई न झाल्यास आमदार संग्राम जगताप यांच्या नेतृत्वाखाली तीव्र आंदोलन करण्याचा इशारा देण्यात आला आहे.
अनेक वर्षापासून सातत्याने राष्ट्रवादी अल्पसंख्यांक विभागाने चायना मांजा विरोधात आवाज उठविला आहे. राज्य सरकारने चायना मांजावर बंदी टाकली असली, तरी त्याची सर्रास विक्री होत आहे. मनपा प्रशासनाने धडक कारवाई हाती घेतल्यास चायना मांजा विक्री थांबून पर्यावरणाची होणारी हानी टाळता येणार आहे. तर अनेक पशु-पक्ष्यांचे जीव देखील वाचणार आहे. -साहेबान जहागीरदार (शहर जिल्हाध्यक्ष, राष्ट्रवादी अल्पसंख्यांक विभाग)