मदान कुटुंबीयांचे अप्पर पोलीस अधीक्षकांना निवेदन
काही पक्षाचे पदाधिकारी पोलीस प्रशासनाची दिशाभूल करत असल्याचा आरोप
अहमदनगर (प्रतिनिधी)- गुलमोहर रोड येथील मोरया युवा प्रतिष्ठान जवळ एका बालकाच्या अपघाती मृत्यू प्रकरणी दिशाभूल करणार्‍या राजकीय दबावाला बळी न पडता योग्य तपास होण्याची मागणी मदान कुटुंबीयांच्या वतीने अप्पर पोलीस अधीक्षक सौरभ अग्रवाल यांच्याकडे करण्यात आली. यावेळी मनोज मदान, अभिलाषा मदान, ललित पोटे, शिवम पवार, निलेश असराणी आदी उपस्थित होते.
नवरात्र उत्सवामध्ये 29 सप्टेंबरला मोरया युवा प्रतिष्ठानच्या मंडळाजवळ रोहित जगधने या बालकाचा अपघाती मृत्यू झाला. रोहितचे झालेले अपघाती मृत्यू धक्कादायक असून, याबद्दल मंडळाला सहानुभूती आहे. मोरया युवा प्रतिष्ठान मागील अनेक वर्षापासून गुलमोहर रोड परिसरात सण, उत्सवामध्ये सामाजिक, सांस्कृतिक कार्यक्रम घेत असतो. कार्यक्रम घेत असताना सगळे शासकीय नियम पाळले जातात. नवरात्र उत्सवात देखील नियमांचे पालन करून कार्यक्रम घेण्यात आले होते. मात्र त्या दुर्देवी घटनेत रोहित जगधने या बालकाचा मृत्यू झाला. ही दुर्घटना घडल्यानंतर मंडळाचे अध्यक्ष अर्जुन मदान सदर मुलाला उपचारासाठी घेऊन पळाले. मुलाला एका खासगी हॉस्पिटलमध्ये घेऊन जाण्यात आले. त्यानंतर मदान यांनी रुग्णवाहिका बोलावून त्याला जिल्हा रुग्णालयात हलविले. मुलाला जिल्हा रुग्णालयात घेऊन गेल्यानंतर त्याला मृत घोषित करण्यात आले. या प्रकरणात मोरया युवा प्रतिष्ठानने एम.एस.इ.बी. कडून रीतसर कनेक्शन घेतले असल्याचे निवेदनात म्हंटले आहे.
मंडळाचे अध्यक्ष अर्जुन मदन हे सामाजिक क्षेत्रात कार्यरत असल्याने त्यांची प्रतिमा मळीन करण्यासाठी त्यांना टार्गेट करण्याचे काम केले जात असल्याचे स्पष्ट करुन, काही पक्षाचे पदाधिकारी पोलिसांना निवेदन देऊन दिशाभूल करण्याचा प्रयत्न करीत आहे. या प्रकरणात राजकीय दबावाला बळी न पडता योग्य तपास करुन कारवाई करण्याची मागणी मदान परिवाराच्या वतीने करण्यात आली आहे.
