नवरात्रीत मोहटादेवीच्या दर्शनासाठी दररोज शहरातील महिलांसाठी निशुल्क बसची व्यवस्था

विपुल वाखुरे पाटील मित्र मंडळ व विनायक राज सोशल फाउंडेशन ट्रस्टचा आगळा-वेगळा उपक्रम

दररोज तीन ते पाच बस भरुन महिला भाविक दर्शनासाठी रवाना

अहमदनगर (प्रतिनिधी)- शारदीय नवरात्र उत्सव मोठ्या उत्साहात साजरा होत असताना, शहर व उपनगरातील महिला भाविकांना निशुल्क श्री क्षेत्र मोहटा (ता. पाथर्डी) येथील जगदंबा देवीच्या दर्शनास पाठविण्याच्या उपक्रमास महिला वर्गाचा उत्स्फुर्त प्रतिसाद मिळत आहे. दरवर्षीप्रमाणे विपुल वाखुरे पाटील मित्र मंडळ व विनायक राज सोशल फाउंडेशन ट्रस्टच्या वतीने शहरात आगळा-वेगळा उपक्रम राबविण्यात येत आहे.

नवरात्र उत्सवात महिला भाविकांना मोफत मोहटादेवीचे दर्शन घडविण्यासाठी हा उपक्रम एका बसद्वारे सुरु करण्यात आला होता. याची व्याप्ती संपूर्ण शहरभर पसरली असून, या वर्षी दररोज तीन ते पाच बस मोहटादेवीला रवाना होत आहे. तब्बल दीड हजार महिलांची मोहटादेवीला जाण्यासाठी नोंदणी झाली असून, दररोज महिला भजनी मंडळ, महिला बचत गट व महिला ग्रुपचा सहभाग लाभत आहे. गुलमोहर रोड भागातून बसेस सोडण्यात येत आहे.

रविवारी (दि.2 ऑक्टोबर) सातव्या माळेला मोहटादेवीच्या दर्शनासाठी महिला भाविकांसह बसेस सोडण्यात आल्या. यावेळी विपुल वाखुरे पाटील, विनय वाखुरे पाटील, प्रदीप वाखुरे पाटील, प्रशांत दारकुंडे, सार्थक लोहार, विकास राऊत, संजय खिस्ती, अक्षय म्हस्के, किरण अंधारे, डॉ. तनुज रोहकले, पांडुरंग सिनारे, खंडाळे, छाया बंडगर, नंदिनी शेटे, कोमल पवार, सोनल तरटे, मंगल भावसार आदींसह महिला मोठ्या संख्येने उपस्थित होत्या.

विपुल वाखुरे पाटील म्हणाले की, दरवर्षी महिला भाविकांना निशुल्क मोहटादेवीचे दर्शन घडविण्यात येते. यावर्षी मात्र महिलांचा उत्साह मोठा असून, दररोज तीन ते पाच बस सोडण्यात येत आहे. विविध भागातील महिला भाविकांचा चांगला प्रतिसाद मिळत आहे. यावर्षी दीड हजार महिलांना मोहटादेवीला पाठविण्यात आले असून, पुढील वर्षी दहा हजार महिला भाविकांना पाठविण्याचा संकल्प असल्याचे त्यांनी सांगितले. विनय वाखुरे पाटील यांनी फाऊंडेशनच्या माध्यमातून राबविण्यात येणार्‍या धार्मिक व सामाजिक उपक्रमाची माहिती दिली.

भाविक महिलांनी फाऊंडेशनच्या युवकांनी मोहटादेवीच्या दर्शनासाठी चांगली सोय केली असून, सर्व महिला भाविक एकत्र येऊन भक्तीभावाने देवीच्या दर्शनास जात आहे. बसच्या सोयीबरोबर महिलांसाठी उपवासाचे खाद्य पदार्थांसह सर्व सोयीकडे विशेष लक्ष दिले जात असून, चांगल्या पध्दतीने मोहटादेवीचे दर्शन होत असल्याची भावना व्यक्त केली.