अशोक काळे मृत्यूप्रकरणी सखोल तपास करण्याची रिपाईची मागणी
विष पिण्यास कोणी प्रवृत्त केले? किंवा विष देऊन मारण्यात आल्याचा तपास व्हावा
अहमदनगर (प्रतिनिधी)- दुसर्‍या पत्नीच्या जाचाला कंटाळून किंवा घातपात करुन अशोक कुंडलिक काळे यांचा मृत्यू झाला असल्याचा आरोप पहिल्या पत्नीच्या मुलांनी केला आहे. विष घेऊन मृत्यू झालेल्या प्रकरणात अकास्मक मृत्यूची नोंद झाली असताना, या प्रकरणात मृत्यूची सखोल चौकशी करुन संबंधितांवर घातपात केल्याचा किंवा आत्महत्येस प्रवृत्त केल्याप्रकरणी 302, 306 प्रमाणे गुन्हे दाखल करण्याची मागणी रिपब्लिकन पार्टी ऑफ इंडियाच्या (गवई) वतीने जिल्हा पोलीस अधीक्षक यांच्याकडे निवेदनाद्वारे करण्यात आली आहे. यावेळी रिपाईचे शहराध्यक्ष सुशांत म्हस्के, मयताचा मुलगा अभय काळे, राहुल डोंगरे, संतोष पाडळे आदी उपस्थित होते.
अशोक काळे यांनी पहिल्या पत्नीच्या निधनानंतर दुसरा विवाह केला होता. त्यांना पहिल्या पत्नीकडून दोन मुले आहेत. शिरसगावला (ता. नेवासा) त्यांच्या मालकीची जमीन होती. त्यांची दुसरी पत्नी, पत्नीचा भाऊ आणि दाजी यांनी सदर जीमन विकण्यास त्यांना भाग पाडले. सर्व पैसेही त्यांनीच वाटून घेतले व अशोक काळे यांना पिटाळून लावले. या वादानंतर त्यांचा घटस्फोट झाला होता. काळे यांचे महत्त्वाचे कागदपत्र देखील त्यांच्या दुसर्‍या पत्नीकडे होते. या कागदपत्रांची वारंवार मागणी करुनही न देता, दुसर्‍या पत्नीचा भाऊ व दाजी त्यांना मारहाण करुन हाकलून लावत असे. यामुळे ते मोठ्या मानसिक दडपणाखाली त्रस्त होते. या त्रासाला कंटाळून त्यांनी 11 ऑक्टोंबर रोजी दुसर्‍या पत्नीच्या घरी विष घेतले. ही माहिती पोलिसांना त्यांच्या पत्नीनेच दिली. उपचारादरम्यान काळे 14 ऑक्टोंबरला मृत्युमुखी पडले असल्याचे निवेदनात म्हंटले आहे.
पहिल्या पत्नीचे दोन मुले असताना देखील त्यांच्या मृत्यूची बातमी त्यांना दिली गेली नाही. त्यांच्या मृत्यूची बातमी लपवण्याचे नेमके कारण समोर येण्याची गरज आहे. कोणताही व्यक्ती मोठे कारण असल्याशिवाय विष घेऊन आत्महत्या करू शकत नाही. कोणत्या त्रासाला कंटाळून त्यांनी विष घेतले?, त्यांना विष पिण्यास कोणी प्रवृत्त केले? किंवा त्यांना विष देऊन मारण्यात आले? याचा तपास करण्याचे म्हंटले आहे.
या प्रकरणी शेवगाव पोलीस स्टेशनमध्ये अकस्मात मृत्यूची नोंद करण्यात आली आहे. परंतु त्यांचा मुलगा अभय काळे व मुलगी अनिता काळे यांनी वडिलांचा घातपात करण्यात आला असल्याचा आरोप केला आहे. अशोक काळे यांच्या मृत्यूची पुन्हा चौकशी करुन संबंधितांवर 302 अथवा 306 कलम प्रमाणे गुन्हा दाखल करण्याची मागणी रिपाईच्या माध्यमातून करण्यात आली आहे. अन्यथा जिल्हा पोलीस अधीक्षक कार्यालयासमोर आमरण उपोषण करण्याचा इशारा देण्यात आला आहे.
