जिल्ह्यातील सेवानिवृत्त कर्मचारी उतरले ईपीएस 95 पेन्शन धारकांच्या आंदोलनात
अहमदनगर (प्रतिनिधी)- ईपीएस 95 पेन्शन धारकांनी दिल्लीतील रामलीला मैदान व जंतरमंतरवर केलेल्या दोन दिवसीय धरणे आंदोलनात एसटी सेवानिवृत्त कामगार व साखर कामगार संघटनेचे पदाधिकारी, सदस्य व ईपीएस 95 पेन्शनर्स मोठ्या संख्येने सहभागी झाले होते. एसटी सेवानिवृत्त कर्मचारी संघटनेचे सदानंद विचारे व कॉ. अतुल दिघे यांच्या नेतृत्वाखाली राज्यातील सेवानिवृत्त एसटी व साखर कामगार आंदोलनात उतरले होते.
साखर कामगार संघटनेचे कॉ. आनंदराव वायकर यांच्या मार्गदर्शनाखाली जिल्ह्यातून साखर कामगारांसह एसटी सेवानिवृत्त कामगार संघटनेचे जिल्हाध्यक्ष बलभीम कुबडे, जिल्हा सचिव गोरख बेळगे, शिवाजी जाधव, रामराव वाघ, भानुदास निजने, भाऊसाहेब गवळी, अंकुश भोरजे, ज्ञानेश्वर गोंधळी, सुदाम मरकड, वासुदेव मरकड आदींसह अहमदनगर जिल्ह्यातील प्रत्येक आगारातून सेवानिवृत कामगार व ईपीएस 95 पेन्शनर्स मोठ्या संख्येने सहभाग नोंदवला.
गेल्या 10 वर्षापासून पेन्शनमध्ये वाढ व्हावी, म्हणून देशातील पेन्शन संघटना एकत्र आंदोलन करीत आहेत. पण या मागणीला यश आले नसून, महागाईच्या काळात ईपीएस 95 पेन्शनर्सला फक्त पाचशे ते दोन हजार पाचशे पर्यंत पेन्शन मिळते. तसेच त्यांचे इतर मागण्यांकडे केंद्र सरकार लक्ष देत नसल्याने त्यांचा जगण्याचा प्रश्न गंभीर बनला असल्याने 7 व 8 डिसेंबरला दिल्लीत देशव्यापी धरणे आंदोलन करण्यात आले होते.
या आंदोलनात अनेक खासदारांनी उपस्थित राहून पाठिंबा दर्शविला. 2023 सालापर्यंत सध्याच्या सरकारने किमान पेन्शन 9 हजार केली नाही, तर देशातील सर्व संघटना एकत्र येऊन देशातील 72 लाख पेन्शन धारक सत्ताधारी पक्षाच्या विरोधात आवाज उठवून येत्या लोकसभेला एक जूट दाखविण्याचा इशारा या आंदोलनातून केंद्र सरकारला देण्यात आला.
आंदोलकांच्या प्रमुख शिष्टमंडळाने पंतप्रधान व केंद्रीय कामगार मंत्रीच्या कार्यालयात निवेदन देऊन दोन दिवसीय आंदोलन स्थगित केले. ईपीएस 95 पेन्शनर्सला किमान 9 हजार पेन्शन व महागाई भत्ता मिळावा, ज्येष्ठ पेन्शनर व त्याच्या पत्नीस आरोग्य सेवा मोफत द्यावी, त्यांच्यासाठी बिनशर्त अन्न सुरक्षा कायदा लागू करावा, कोशियारी समितीच्या शिफारसी लागू करण्याच्या मागण्या आंदोलकांनी केल्या आहेत.
