10 हजारचे केले 79 हजार वसूल, तरीही पैश्यासाठी त्रास दिला जात असल्याचा आरोप
चौकशी आदेशाचे उपधर्मादाय आयुक्त कार्यालयाकडून केराची टोपली
अहमदनगर (प्रतिनिधी)- त्या सार्वजनिक देवालय ट्रस्टच्या सावकारीला कंटाळून व या प्रकरणात चौकशीचे आदेश होऊन देखील उपधर्मादाय आयुक्त कार्यालयाकडून दखल घेतली जात नसल्याने दिव्यांग व्यक्ती गोरक्ष सावळेराम कहाणे यांनी मुंबई मंत्रालया समोर 2 डिसेंबरला आत्मदहन करण्याचा इशारा दिला आहे. याबाबतचे निवेदन कहाणे यांनी जिल्हाधिकारी कार्यालयात देऊन या प्रकरणी चौकशी करुन देवालय ट्रस्टच्या बेकायदेशीर सावकारकीला पायबंद करुन न्याय देण्याची मागणी केली आहे.
अकोले तालुक्यातील चास येथील सार्वजनिक देवालय ट्रस्टच्या बेकायदेशीर सावकारी व इतर कारभाराबाबत चौकशी होण्यासाठी दिव्यांग व्यक्ती गोरक्ष कहाणे यांनी अनेक वेळेस तक्रार अर्ज दिलेला आहे. सदर देवस्थानचे विश्‍वस्त एक रक्कम फंड म्हणून 10 हजारचे 18 हजार रुपये 11 महिन्यासाठी मुद्दल, व्याज घेतात. असे अंदाजे चाळीस ते पन्नास कुटुंबाकडून मुद्दल व व्याज घेतले जातात. सदर रक्कम हुकूमशाही प्रमाणे वसूल केली जाते. याबाबत कोणी काही बोलल्यास त्याला शिवीगाळ व दादागिरीची भाषा वापरली जाते. सदर मुद्दल व व्याज ही रक्कम देवस्थानच्या खात्यावर भरली जाते. रक्कम ऑडीटमध्ये दाखवली जात नाही. खोटे व बोगस ऑडिट पैसे देऊन केले जातात. या ट्रस्टचे इतके दहशतीचे वातावरण आहे की, त्यांच्या त्रासाला कंटाळून अनेक कुटुंबे गाव सोडून गेली असल्याचा आरोप करण्यात आला आहे.
या ट्रस्टचे सर्व देणगी पुस्तक तपासण्यात यावे यासाठी धर्मदाय आयुक्त यांना 5 एप्रिल रोजी तक्रार अर्ज दिला होता. त्या पत्राचे आधारे विधी व न्याय विभाग मुंबई यांनी 6 मे रोजी धर्मदाय आयुक्त यांना पत्र पाठवून सदर तक्रार अर्जावर तात्काळ चौकशी करून शासनास व अर्जदारास अहवाल सादर करण्याचे आदेश दिलेले होते. या पत्रावर आजपर्यंत काहीच कारवाई झालेली नाही. या पत्राला धर्मदाय आयुक्त यांनी केराची टोपली दाखवली आहे. त्यानंतर धर्मदाय आयुक्त यांना 19 ऑगस्ट रोजी चौकशी करण्याबाबत विनंती अर्ज दिला होता. त्या अर्जाबाबत अध्यापि काहीच कारवाई करण्यात आलेली नाही. या प्रकरणात पैश्याची अफरातफर सुरू असून, हे प्रकरण दडपण्याचा प्रयत्न सुरू असल्याचे निवेदनात म्हंटले आहे.
देवस्थानचे पदाधिकारी देवस्थानच्या पैश्याचा सावकारकीसाठी वापर करतात. ट्रस्टने जे लेखापरीक्षण अहवाल धर्मदाय कार्यालयात दाखल केलेले आहेत. सर्व बनावट व खोटे आहेत. देवस्थान मधील नोंदणी करताना हयात असणार्‍या अनेक विश्‍वस्त मयत झाले असून, त्यांचा आजपर्यंत कोणताही बदल अर्ज दाखल झालेला नाही. ठराविक विश्‍वस्त मनमानी पद्धतीने कामकाज करतात. दहा वर्षांमध्ये 10 हजार रुपयाचे 79 हजार रुपये व्याज मुद्दल वसूल करण्यात येऊनही माझ्याकडे मुद्दल दाखवली जात असल्याचे कहाणे यांनी म्हंटले आहे.
याप्रकरणी धर्मदाय आयुक्त कार्यालयात चौकशीसाठी गेलो असता उडवा उडवीची उत्तरे देऊन एका दिव्यांग व्यक्तीला अपमानास्पद वागणुक दिली जात आहे. या प्रकरणात चौकशी अधिकारी समोरच्या व्यक्तींना म्हणणे मांडण्यास जाणून बुजून मुदतवाढ देऊन त्यांना सहकार्य करीत असून, या प्रकरणाची सखोल चौकशी करुन दोषींवर कारवाई व्हावी व त्या सार्वजनिक देवालय ट्रस्टची बेकायदेशीर सावकारकी बंद करण्याची मागणी कहाणे यांनी केली आहे.
