सुवर्ण महोत्सवी स्नेह मेळाव्यात ऐंशी व नऊव्वदी पार केलेल्या गुरुजनांची उपस्थिती
भिंगार हायस्कूलचे 1971-72 मधील मॅट्रिकचे मित्र-मैत्रिण एकवटले
अहमदनगर (प्रतिनिधी)- अ.ए.सो. भिंगार हायस्कूलच्या सन 1971-72 च्या मॅट्रिकच्या (इयत्ता अकरावी, एस.एस.सी) माजी विद्यार्थ्यांचा सुवर्ण महोत्सवी स्नेह मेळावा उत्साहात पार पडला. आजी-आजोबा झालेले माजी विद्यार्थी तब्बल 50 वर्षानंतर एकत्र आले होते. विशेष म्हणजे वयाची ऐंशी व नऊव्वदी पार केलेले गुरुजनांनी देखील आपल्या लाडक्या विद्यार्थ्यांना भेटण्यासाठी कार्यक्रमाला हजेरी लावली. एवढ्या प्रदीर्घ काळानंतर उतार वयात एकत्र आलेल्या मित्र-मैत्रिणींना आपल्या शालेय जीवनातील जुन्या आठवणींना उजाळा दिला.
शाळेची घंटा वाजताच उपस्थितांना शाळा भरल्याच्या जुन्या आठवणीत नेले. पन्नास वर्षापूर्वी शिक्षण देणार्या शिक्षकांची वर्गात प्रवेश करताच माजी विद्यार्थी भारावले. उपस्थित गुरुजन व मित्र-मैत्रिणींनी एकत्र प्रार्थना म्हंटली. प्रारंभी सरस्वती पूजन व प्रार्थनेने या कार्यक्रमाची सुरुवात झाली.
विद्यार्थी दशेतील परिस्थिती, खडतर प्रवासात घेतलेले शिक्षण, वेळोवेळी गुरुजनांचे मिळालेले मार्गदर्शन, तर जुन्या सवंगडींचा सहवास या जुन्या आठवणीत सर्व रममाण झाले होते. या कार्यक्रमासाठी गणित विषयाचे जगन्नाथ बारगळ, इंग्रजीचे शिक्षक एस.डी. कुलकर्णी, संस्कृतच्या पंकजा कुलकर्णी, क्रीडा शिक्षक आप्पासाहेब गावडे, नरसिंग रसाळ, कला शिक्षक वसंत विटणकर, प्रकाश डेरे, शरद बरबरे तर सध्याचे भिंगार हायस्कूलचे मुख्याध्यापक आर.बी. बेद्रे उपस्थित असलेल्या गुरुजनांचा माजी विद्यार्थ्यांनी स्मृतीचिन्ह देऊन सन्मान केला.
एवढ्या वर्षानंतर एकत्र आलेल्या गुरु-शिष्यांच्या भेटीने अनेकांचे डोळे पाणावले. माजी विद्यार्थी आपल्या गुरुजनांनी दिलेल्या शिक्षणातून आपण कसे घडलो? जीवनातील ध्येय कशा पध्दतीने गाठले यावर बोलते झाले. गुरुजनांनी दिलेल्या शिक्षणाची शिदोरी आयुष्यभर कामाला आली असल्याची भावना माजी विद्यार्थ्यांनी व्यक्त केली. उपस्थित गुरुजनांनी देखील आपल्या लाडक्या विद्यार्थ्यांना नावानीशी हाक दिल्याने माजी विद्यार्थी देखील अवाक झाले. गुरु व शिष्य दोन्ही आपल्या नोकरी, व्यवसाय व कामधंद्यातून निवृत्त झालेले असताना आपल्या जीवनातील अनुभव विशद केले.
या बॅचचे माजी विद्यार्थी असलेले अॅड. गोकुळ बिडवे यांनी प्रास्ताविकात शाळेच्या अनेक जुन्या आठवणींना उजाळा दिला. या स्नेह मेळाव्यासाठी जिल्ह्यासह राज्यातील विविध भागातून माजी विद्यार्थी एकत्र आले होते. या सुवर्ण महोत्सवी स्नेह मेळाव्याचे बाबासाहेब जावळे, अॅड. गोकुळ बिडवे, शंकर भुजबळ, मुकुंद बरबरे, कैलास बेरड, अनिल बडदे, सुरेखा शिवगुंडे, रंजना जमदाडे, छबुताई बोचरे यांनी नियोजन केले होते. शाळा सुटल्याची घंटा वाजवताच उपस्थितांनी शाळा सुटल्याचा आनंद लुटला. यावेळी विविध मनोरंजनात्मक खेळ घेण्यात आले.
