महावितरण कार्यालया समोर जमाव जमवून घोषणा देण्यात आल्याचा आरोप
अहमदनगर (प्रतिनिधी)- शहर शांतता व सुव्यवस्था अबाधित राखण्यासाठी जिल्हाधिकारी यांनी जारी केलेल्या 37 (1) जमावबंदी आदेशाचे उल्लंघन करुन बेकायदेशीर जमाव जमवून घोषणा देणार्‍या महावितरणच्या तांत्रिक कामगार युनियनच्या पदाधिकार्‍यांवर गुन्हे दाखल करण्याची मागणी सैनिक समाज पार्टीच्या वतीने करण्यात आली आहे.
या मागणीचे निवेदन संघटनेचे जिल्हाध्यक्ष रावसाहेब काळे यांनी जिल्हा पोलीस अधीक्षक, मुख्यमंत्री सचिवालय कक्ष व जिल्हाधिकारी कार्यालयात दिले आहे.
महावितरण कार्यालय येथे 20 नोव्हेंबर रोजी सकाळी तांत्रिक कामगार युनियनच्या पदाधिकार्‍यांनी व कर्मचार्‍यांनी बेकायदेशीरपणे जमाव जमवून युनियनच्या शाखेचे उद्घाटन केले. या ठिकाणी जमलेल्या जमावाने घोषणा देऊन शांततेचा व जमावबंदी आदेशाचा भंग केला असल्याचा आरोप संघटनेच्या वतीने करण्यात आला आहे.
तसेच कार्यक्रमासाठी रस्ता अडवून रस्त्याच्या बाजूला विनापरवाना फलक लावण्यात आले असल्याचे निवेदनात म्हंटले आहे. संघटनेच्या पदाधिकार्‍यांनी पदाचा दुरुपयोग करून जिल्हाधिकारी यांच्या आदेशाचा भंग केला आहे. जमावाला जमवून भाषणे करुन घोषणा देणार्‍या संघटनेच्या त्या 25 पदाधिकार्‍यांवर गुन्हे दाखल करण्याची मागणी सैनिक समाज पार्टीने केली आहे. अन्यथा 23 जानेवारी पासून मुंबई येथील आझाद मैदानात आमरण उपोषण करण्याचा इशारा देण्यात आला आहे.
