उड्डाणपूलावर डोळे दिपवून टाकणारा लेजर शो
तर आसमंत उजळून टाकणारी फटाक्यांची आतषबाजी
अहमदनगर (प्रतिनिधी)- शहरातील नागरिकांचे उड्डाणपूलाचे स्वप्न सत्यात उतरले अन शहरात शनिवारी (19 नोव्हेंबर) उद्घाटनानंतर संध्याकाळी दिवाळीच साजरी झाली. उड्डाणपूलावर नगरकरांचे डोळे दिपवून टाकणारे लाईटीचा लेजर शो व आसमंत उजळून टाकणारी फटाक्यांची आतषबाजी करण्यात आली.
उड्डाणपूल उद्घाटनाचा आनंदोत्सव साजरा करण्यासाठी लाईट, साऊंड व आतषबाजीचे नियोजन करण्यात आले होते. उड्डाणपूलावर पाच ते सहा ठिकाणी नियोजन करण्यात आलेल्या साऊंड सिस्टिमसह लेजर शो व फटाक्यांची आतषबाजीचा आनंद नगरकरांनी घेतला. हा आनंदोत्सवात सहभागी होण्यासाठी व उड्डाणपूलावर जाण्यासाठी नगरकरांनी मोठी गर्दी केली होती.
खासदार डॉ. सुजय विखे व आमदार संग्राम जगताप यांनी उड्डाणपूलावरुन या सोहळ्याचा प्रत्यक्ष अनुभव घेतला. तर पालकमंत्री ना. राधाकृष्ण विखे पाटील व जिल्हाधिकारी डॉ. राजेंद्र भोसले यांनी अरुणोदय हॉस्पिटलच्या छतावरुन हा डोळे दिपणारा क्षण पाहिला.
तासभर चाललेला हा ऐतिहासिक क्षण नागरिकांनी आपल्या मोबाईलच्या कॅमेर्यात कैद केला. सोशल मिडीयावरती फक्त उड्डाणपूलची चर्चा व विविध क्षणचित्रे रंगत आहे.
