नेहमीच्या वाहतुक कोंडीमुळे घरी जाणे-येणे अवघड झाल्याचा आरोप
रहिवासी क्षेत्रात अजून नव्याने होत असलेल्या हॉस्पिटलला परवानगी न देण्याची मागणी
अहमदनगर (प्रतिनिधी)- सावेडीतील गायकवाड कॉलनी, अर्बन बँक कॉलनी व लॉयड कॉलनी परिसरात तब्बल 7 मोठी हॉस्पिटल असताना, या रहिवासी क्षेत्रात अजून नव्याने होत असलेल्या हॉस्पिटलला परवानगी देऊ नये व या भागात असलेल्या हॉस्पिटलकडून रहिवासी नागरिकांना त्रास होत असल्याची तक्रार स्थानिक नागरिकांनी निवासी उपजिल्हाधिकारी राजेंद्रकुमार पाटील, मनपा आयुक्त डॉ. पंकज जावळे व जिल्हा पोलीस अधीक्षक राकेश ओला यांच्याकडे निवेदनाद्वारे केली आहे. यावेळी शिवसेना जिल्हा उपप्रमुख आनंद लहामगे, पी.आर. कुलकर्णी, बाळासाहेब गायकवाड, हेमंत कोहळे, रविंद्र जेवरे, रविंद्र कुलकर्णी, जयंत रसाळ, अतुल मांजरे, गुलशन बोरा आदींसह परिसरातील नागरिक उपस्थित होते. तर निवेदनावर मोठ्या प्रमाणात स्थानिक नागरिकांच्या स्वाक्षर्‍या आहेत.
गायकवाड कॉलनी, अर्बन बँक कॉलनी व लॉयड कॉलनी भागातील नागरिकांना या परिसरात असलेल्या हॉस्पिटलच्या कर्मचार्‍यांची वाहने, रुग्णांच्या नातेवाईकांची वाहने रस्त्यावर उभे असल्याने वारंवार वाहतूक कोंडी व इतर त्रासाला सामोरे जात आहे. या रहिवासी भागात तब्बल सात मोठे हॉस्पिटल असताना या व्यतिरिक्त महापालिका प्रशासनाने सध्या नवीन दोन हॉस्पिटलला परवानगीचे प्रस्ताव दाखल आहे. हे दोन्ही हॉस्पिटल सुरु झाल्यास स्थानिक नागरिकांना हॉस्पिटलची वाहने, रुग्णांच्या नातेवाईकांची वाहने व रुग्णवाहिकांच्या गराड्यातून वाट काढत जाणे अवघड होणार आहे. या भागात सध्या वाहतूक कोंडीचा विषय कायमचा झाला आहे. विद्यार्थी, वयस्कर लोक व कार्यालयीन कर्मचारी यांना घराबाहेर जाणे व परत येणे अवघड होऊन बसले आहे. रात्री अपरात्री वारंवार रुग्णवाहिकेच्या आवाजाने ज्येष्ठ नागरिकांसह परिसरातील नागरिकांची झोप उडत असल्याचे स्पष्ट करण्यात आले आहे.
या भागात दहा ते बारा फुटी रुंदीचे रस्ते असल्याने हॉस्पिटल प्रशासन दवाखान्यात येणारे पेशंट, त्यांचे नातेवाईक यांच्या वाहनांच्या पार्किंगचे योग्य नियोजन करत नाही. सदरील वाहने रस्त्याच्या मध्ये कुठेही लावली जातात. वारंवार वाहतुक कोंडीमुळे स्थानिक नागरिकांचे वाहन चालकांशी वाद होतात. या प्रकरणी हॉस्पिटलच्या कर्मचार्‍यांशी बोलल्यास ते देखील अत्यंत उद्धटपणे वागतात यामुळे रहिवासींना त्रास होत असल्याचा आरोप नागरिकांनी केला आहे.
या भागात नवीन होत असलेल्या दोन हॉस्पिटलला स्थानिक नागरिकांचा विरोध आहे. याप्रकरणी तक्रार करुन देखील महापालिकेने काहीच कारवाई केलेली नाही. हॉस्पिटल हे लोकांचे जीव वाचवण्यासाठी आहे. परंतु येथील हॉस्पिटलमुळे कॉलनीतील नागरिकांच्या आरोग्यावर विपरीत परिणाम होत आहे. वाहतुक कोंडीमुळे या परिसरात अनेक लहान-मोठे अपघात देखील घडत असल्याचे निवेदनात म्हंटले आहे. नव्याने प्रस्तावित हॉस्पिटलला परवानगी देऊ नये. वाहन चालकांना शिस्त लावण्यासाठी या भागात वाहतूक पोलीस नियुक्त करावा, यामुळे होणार्‍या दुर्घटना व वाहतूक कोंडी पासून नागरिकांना सुटका मिळणार असल्याचे निवेदनात म्हंटले आहे. सदर प्रश्‍न न सुटल्यास स्थानिक नागरिकांनी आंदोलनाचा इशारा दिला आहे.
जिल्हा पोलीस अधीक्षक राकेश ओला यांनी या तक्रारीची तात्काळ दखल घेऊन, वाहतुकीस अडथळे आणणार्‍यांवर कारवाई करण्याचे संबंधित अधिकार्‍यांना सूचना केल्या.
महापालिका प्रशासनाने रहिवासी ठिकाणी मोठमोठ्या हॉस्पिटलला परवानगी देताना, रस्ते व परिसर पहाणी करणे आवश्यक आहे. मोठे हॉस्पिटल उभे राहिल्यास त्याचा स्थानिक नागरिकांना त्रास होणार नाही, याची देखील शहानिशा करणे आवश्यक आहे. या भागातील मोठ-मोठ्या हॉस्पिटलच्या जाळ्यामुळे स्थानिक नागरिकांचा जीव गुदमरला जात आहे. एकाच ठिकाणी झालेल्या सात ते आठ हॉस्पिटलकडून त्यांना मोठा त्रास सहन करावा लागत आहे. हॉस्पिटल प्रशासनाने याची दखल न घेतल्यास नागरिकांच्या रोषाला सामोरे जावे लागेल. – आनंद लहामगे (जिल्हा उपप्रमुख, शिवसेना (ठाकरे) )
