शासन निर्णयातील तरतुदीनूसार जिल्हा परिषद समाज कल्याण विभागातंर्गत लोकवस्तीला नाव
अहमदनगर (प्रतिनिधी)- जिल्हा परिषद समाज कल्याण विभागातंर्गत अनुसूचित जाती व नवबौध्द घटकांचा विकास करणे योजनेतंर्गत नवीन वस्त्या घोषित करण्याच्या शासन निर्णयातील तरतुदीनूसार सावरगाव (ता. पारनेर) येथे संत रोहिदास महाराजनगर या घनदाट वस्तीचे नामकरण करण्यात आले.
वस्तीच्या नामकरणाच्या फलकाचे अनावरण माजी आमदार सितारामजी घनदाट (मामा) सामाजिक प्रतिष्ठानचे मार्गदर्शक मोहनदादा घनदाट यांच्या हस्ते करण्यात आले. यावेळी प्रसंगी चर्मकार विकास संघाचे प्रदेशाध्यक्ष संजय खामकर, सरपंच पर्बती चिकणे, उपसरपंच प्रदीप गुगळे, सुभाष गुगळे, रामदास सोनवणे, अमोल डोळस, अरुण गाडेकर, अण्णा खैरे, संतोष खैरे, प्रवीण कांबळे, देवराम मगर, बाळासाहेब शिरतारे, विष्णू माने, मच्छिंद्र दळवी, मोहन सोनवणे, चांगदेव तुपे, क्षीरसागर पेंटर, नितीन आंबेकर, रमेश पाखरे, संतोष केदारी, गंगाधर कदम, सुरेखा शेलार आदींसह ग्रामस्थ मोठ्या संख्येने उपस्थित होते.
मोहनदादा घनदाट यांनी जातीनूसार वस्त्यांना असणारी नावे बदलून महापुरुषांची नाव देण्याचा शासनाचा निर्णय अभिनंदनीय आहे. यामुळे जातीच्या उतरंडी नष्ट होण्यास मदत होणार असल्याचे सांगितले.
संजय खामकर म्हणाले की, सामाजिक समतेसाठी वस्त्यांना जातीऐवजी महापुरुषांची नावे देणे योग्य आहे. यामुळे महाराष्ट्रासारख्या पुरोगामी राज्यात सामाजिक सलोखा आणि सौहार्द निर्माण होऊन राष्ट्रीय एकात्मता वाढण्यास मदत होणार आहे. वर्षानुवर्षे टिकलेल्या जातीय विषमता कमी होण्यास मदत होणार आहे. त्यामुळे लोकवस्तीमधील सर्व नागरिक गुण्यागोविंदाने राहणार असल्याचे त्यांनी सांगितले.
पाहुण्यांचे स्वागत मधुकर घनदाट यांनी केले. चर्मकार समाजाच्या वतीने सामाजिक न्याय विभागाचे सहाय्यक आयुक्तांचे यावेळी आभार मानण्यात आले.