मोहम्मद पैगंबर जयंतीचा सरवरे आलम कमिटी व एफ.जे. ग्रुपचा उपक्रम
पैगंबरांचे खरे विचार समाजाला देण्याचा प्रयत्न कौतुकास्पद -आ. संग्राम जगताप
अहमदनगर (प्रतिनिधी)- ईस्लाम धर्माचे प्रेषित मोहम्मद पैगंबर यांनी जगाला दिलेले समता, बंधुता व प्रेमाच्या संदेशाचे विचार त्यांची जयंती ईद ए मिलाद निमित्त प्रदर्शन रुपाने सरवरे आलम कमिटी व एफ.जे. ग्रुपच्या वतीने मांडण्यात आले आहे. जुना बजार येथील विश्‍वनायक सभागृहात भरविण्यात आलेल्या या प्रदर्शनाचे उद्घाटन आमदार संग्राम जगताप यांच्या हस्ते झाले.
माजी समाज कल्याण अधिकारी रफिक मुन्शी यांच्या अध्यक्षतेखाली झालेल्या या कार्यक्रमासाठी अक्षय कर्डिले, प्रवचनकार इंजि. अब्दुल वाजेद कादरी, उद्योजक करिमशेठ हुंडेकरी, शिवसेनेचे शहरप्रमुख संभाजी कदम, नगरसेवक बाळासाहेब बोराटे, दत्ता कावरे, अविनाश घुले, समद खान, मुजाहिद (भा) कुरेशी, साहेबान जहागीरदार, फैजान जहागीरदार, अ‍ॅड. ए.के. गुगळे, प्राचार्य डॉ. रिजवान अहमद, बाबासाहब जहागीरदार, जावेद खान (जे.के.), शकिल शेख, अन्वर सय्यद आदींसह युवक मोठ्या संख्येने उपस्थित होते.
आमदार संग्राम जगताप म्हणाले की, भावी पिढीसमोर खर्‍या बाबी प्रदर्शनरुपाने धाडसाने मांडण्यात आले आहे. कोणाच्या आवडीनुसार विषय मांडण्यात आला नसून, सत्यता व प्रेषित मोहम्मद पैगंबरांचे खरे विचार समाजाला देण्याचा प्रयत्न करण्यात आला आहे. खर्‍या धार्मिकबाबी समाजासमोर आल्यास समाजाला चांगली दिशा मिळणार असल्याचे त्यांनी सांगितले व पैगंबर जयंतीच्या सर्वांना शुभेच्छा दिल्या.
अक्षय कर्डिले यांनी युवकांना धर्माचे योग्य ज्ञान व इतिहास समजल्यास युवा वर्ग भरकटणार नाही. महापुरुषांनी अखंड मानव जातीच्या कल्याणासाठी कार्य केले. त्यांचा आदर्श समोर ठेऊन वाटचाल केल्यास सुख, समाधान मिळणार असल्याचे त्यांनी स्पष्ट केले.
प्रवचनकार इंजि. अब्दुल वाजेद कादरी, यांनी आपल्या प्रवचनातून मोहम्मद पैगंबर यांच्या विचारांचा संदेश दिला. या प्रदर्शनात अंधारातून प्रकाशाकडे नेणारे प्रेषित मोहम्मद पैगंबरांचे विचार मांडण्यात आले आहे. तसेच जगातील इतर महापुरुषांनी त्यांच्याबद्दल व्यक्त केलेल्या भावनांचा प्रदर्शनात समावेश आहे. या प्रदर्शनास माजी शिक्षण संचालक दिनकर टेमकर, आरोग्य विभागाचे सहसंचालक डॉ.आसाराम खाडे, हरिभाऊ डोळसे यांनी भेट देऊन या उपक्रमाचे कौतुक केले.
या कार्यक्रमात उपस्थितांना मराठी भाषेतील साने गुरुजी आणि इतर लेखकांचे पुस्तकं वाटप करण्यात आले. तर अनाथ व गरजू विद्यार्थ्यांना शालेय साहित्याचे वाटप करण्यात आले. भंडार्‍याने कार्यक्रमाची सांगता झाली.
या दोन दिवसीय प्रदर्शनास सर्व धर्मिय नागरिकांचा चांगला प्रतिसाद मिळत असून, सर्व धर्मियांनी या प्रदर्शनाला भेट देऊन त्यांचे विचार जाणून घेण्याचे आवाहन आयोजकांच्या वतीने करण्यात आले आहे.
