भाजी व फळ विक्रेत्यांना मागे सरकवून बसविण्यासाठी नागापूर भाजीपाला मटन, मासे व्यापारी असोसिएशनचा पुढाकार
परिसराची स्वच्छता व मार्किंग करुन विक्रेत्यांना बसविण्याचा निर्णय
अहमदनगर (प्रतिनिधी)- नगर-मनमाड महामार्गावरील एमआयडीसी हद्दीत थेट रस्त्यावरच भाजीबाजार मांडण्याच्या अट्टहासाने वाहतूक कोंडीसह अपघातांना आमंत्रण मिळत आहे. विक्रेत्यांकडे भाजीपाला खरेदीसाठी येणार्‍या ग्राहकांची वाहने रस्त्यावर पार्क केली जात असल्याने येणार्‍या वाहनांना अडथळे निर्माण होतात. त्यामुळे वाहतुक कोंडी देखील होत आहे.
या प्रश्‍नावर तोडगा काढून भाजी विक्रेत्यांना मागे सरकून बसविण्यासाठी नागापूर भाजीपाला मटन, मासे व्यापारी असोसिएशनने पुढाकार घेतला आहे. या परिसराची स्वच्छता व मार्किंग करुन भाजी व फळ विक्रेत्यांना मागे सरकवून बसविण्यासाठी व वाहतुकीला अडथळा निर्माण न होता, नियोजन केले जाणार असल्याची माहिती असोसिएशनचे अध्यक्ष अंतोन गायकवाड यांनी दिली.
एमआयडीसी येथील सनफार्मा चौक ते सह्याद्री चौक तसेच एमआयडीसी पोलीस स्टेशन पर्यंत रस्त्याच्या कडेला भाजी व फळ तसेच मटण- मच्छी बाजार भरत आहे. प्रत्येक विक्रेता जास्त ग्राहक आपल्यापर्यंत कसे पोचतील या अपेक्षेने थेट रस्त्यावरच्या जागेची निवड करून तेथे भाजीपाला विक्रीसाठी ठेवत आहे. सदर बाजार थेट रस्त्याच्या कडेलाच भरविले जात असल्याने वाहतुकीस कोंडी निर्माण होत आहे. तर अनेल लहान-मोठे अपघात घडत आहे. ग्राहक वर्ग देखील रस्त्यावर वाहने लावतात किंवा गाडीवर बसल्या-बसल्या भाजी खरेदी करतात.
या बेशिस्तीमुळे सर्वसामान्य नागरिकांना त्रास सहन करावा लागत आहे. रस्त्यालगत बसलेल्या दुकानदारांना मागे सरकून बसण्यासाठी मोठी प्रशस्त जागा आहे. मात्र स्थानिक दुकानदारांनी मागे टाकलेला कचरा व पुढे बसण्याच्या अट्टहासाने हा धोकादायक बाजार जीवावर उठला आहे. पोलीस व एमआयडीसी प्रशासनाने कारवाई केल्यास कारवाईनंतर हे बाजार पुन्हा जैसे थे असे बसले जातात. या धोकादायक बाजारात एखादे अवजड वाहन घुसल्यास मोठी जीवितहानी होण्याची शक्यता नाकारता येत नाही. परिस्थितीची जाणीव ठेऊन संघटनेने ग्राहक व स्थानिक व्यावसायिकांच्या सुरक्षिततेच्या दृष्टीकोनातून त्यांना मागे सरकवून बसविण्यासाठी पाऊल उलचलले आहे.
एमआयडीसी येथे रस्त्यालगत बसत असलेल्या भाजीविक्रेत्यांना मागे सरकून बसवण्यासाठी मोठी जागा आहे. मागील जागेची जेसीबीद्वारे स्वच्छता करुन सर्वांना मागे सरकवून बसवण्यासाठी संघटना प्रयत्नशील आहे. ग्राहकांना देखील व्यवस्थित वाहने लावून बाजार घेता येणार आहे. ग्राहक व विक्रेत्यांना शिस्त लावून चांगल्या पध्दतीने बाजार भरविण्यासाठी प्रयत्न केले जाणार आहे. यासाठी सर्व विक्रेते व ग्राहकांनी सहकार्य करावे. -अंतोन गायकवाड (अध्यक्ष, नागापूर भाजीपाला मटन, मासे व्यापारी असोसिएशन)
मागील बाजूस स्थानिक दुकानदारांनी घाण, कचरा टाकल्याने बसण्यास अडचण निर्माण झाली आहे. या परिसराची स्वच्छता करुन बसण्याची व्यवस्था करुन दिल्यास मागे सरकून बसण्यास हरकत नाही. चांगली जागा नसल्याने नाईलाजाने जीव धोक्यात घालून रस्त्यालगत बसावे लागत आहे. -अंजू सकट (भाजी विक्रेती)