विद्यार्थ्यांनी केले देशभक्तीवरील गीतांचे सादरीकरण
अहमदनगर (प्रतिनिधी)- पद्मशाली विदया प्रसारक मंडळाच्या गांधी मैदान येथील श्री मार्कंडेय माध्यमिक आणि उच्च माध्यमिक विदयालय तसेच प्रा.बत्तीन पोट्यान्ना प्राथमिक विद्यालयात 74 वा प्रजासत्ताक दिन उत्साहात साजरा करण्यात आला. शाळेचे माजी विद्यार्थी सचिन शेकटकर यांचा 12 वर्षीय मुलगा नील शेकटकर याने जलतरणात केलेल्या विक्रमाची एशिया बुक ऑफ रेकॉर्डसमध्ये नोंद झाल्याबद्दल त्याचा यावेळी गौरव करण्यात आला.
प्रजासत्ताक दिनानिमित्त ध्वज फडकविण्याचा मान देखील नील शेकटकर या लहान जलतरणपटूला देण्यात आला होता. यावेळी संस्थेचे अध्यक्ष तथा माजी प्राचार्य बाळकृष्ण सिद्दम, ज्येष्ठ विश्‍वस्त शरद क्यादर, उपाध्यक्ष विलास पेद्राम, सचिव डॉ. रत्नाताई बल्लाळ, विश्‍वस्त राजेंद्र म्याना, महेंद्र बिज्जा, सचिन शेकटकर, हेमांगी शेकटकर, पद्मशाली युवा शक्तीचे रवी दंडी, माजी चेअरमन दत्तात्रय रासकोंडा, माध्यमिकचे मुख्याध्यापक संदिप छिंदम, उपमुख्याध्यापक पांडूरंग गोने, पर्यवेक्षिका सरोजनी रच्चा, प्राथमिकचे मुख्याध्यापक श्रीनिवास मुत्त्याल, शिक्षक प्रतिनिधी भानुदास बेरड आदींसह शालेय शिक्षक, विद्यार्थी व पालक मोठ्या संख्येने उपस्थित होते.
विद्यालयाचे मुख्याध्यापक संदिप छिंदम यांनी प्रास्ताविकात नील शेकटकरने आपल्या शहराचे नाव उंचावले आहे. मुळ अहमदनगरचा असलेल्या शेकटकरचे वडिल सचिन शेकटकर मार्कंडेय विद्यालयाचे माजी विद्यार्थी आहे. ध्येय समोर ठेऊन वाटचाल करण्यासाठी नील हा विद्यार्थ्यांसमोर एक आदर्श असल्याचे त्यांनी सांगितले.
प्रारंभी बॅण्ड पथकाच्या निनाद पाहुण्यांचे स्वागत, ध्वजारोहण होऊन बासरीद्वारे वाजवलेली राष्ट्रगीतची धून व शालेय विद्यार्थ्यांनी सादर केलेल्या देशभक्तीवर गीतांनी अंगावर शहारे आणले. भारत माता की जय…., वंदे मातरमच्या घोषणांनी शालेय परिसर दणाणून निघाला होता.
बाळकृष्ण सिद्दम म्हणाले की, संविधान हा देशाचा अभिमान असून, देशाचे सार्वभौमत्व व कल्याण यामध्ये सामावलेले आहे. यामुळे देशाच्या संपन्नतेचा पाया रचला गेला. राष्ट्रीय सणामधून देश प्रेरणा मिळत असते. तर देशातील विविधतेमधून एकात्मता राष्ट्रीय सणांमधून दिसून येत असल्याचे त्यांनी सांगितले. तर विद्यार्थ्यांना आपल्यामधील विशेष कला, गुण ओळखून त्या दिशेने भविष्याची वाटचाल करण्याचे त्यांनी आवाहन केले.
सचिन शेकटकर म्हणाले की, नगरच्या मातीशी नाळ जोडलेली आहे. वडिलांमुळे मुलांची ओळख निर्माण होते, मात्र मुलामुळे वडिलांची ओळख निर्माण होणे अभिमानास्पद आहे. विद्यार्थ्यांनी लहान वयातच ध्येय निश्‍चित केले पाहिजे. यश मिळविण्यासाठी आत्मविश्‍वास व संयम महत्त्वाचे आहे. अपार मेहनत, जिद्द व चिकाटीने इमेज तयार होत असल्याचे त्यांनी सांगितले. तर शालेय जीवनातील जुन्या आठवणींना त्यांनी उजाळा दिला.
जलतरणपटू नील शेकटकर याने मातृभूमीचा अभिमान बाळगा. वडिलांच्या शाळेत ध्वजारोहणाचा मान मिळाला हे अभिमानास्पद असल्याचे सांगितले. तर मुलांना आहार व व्यायामाकडे लक्ष देण्याचे त्याने आवाहन केले. कार्यक्रमाचे सूत्रसंचालन ग्रंथपाल विष्णू रंगा यांनी केले. शिक्षक प्रतिनिधी भानुदास बेरड यांनी आभार मानले.