शाळेचा पहिला दिवस प्रवेशोत्सव उपक्रमाने साजरा
रांगोळी, फुग्यांची सजावट व विद्यार्थी मोबाईलकडून शाळेकडे जातानाच्या चित्राने वेधले सर्वांचे लक्ष
अहमदनगर (प्रतिनिधी)- गांधी मैदान येथील पद्मशाली विद्या प्रसारक मंडळाच्या श्री मार्कंडेय विद्यालय व प्रा.बत्तीन पोट्यन्ना प्राथमिक विद्यालयात शाळेचा पहिला दिवस प्रवेशोत्सव उपक्रमाने साजरा करण्यात आला. विद्यार्थ्यांचे बॅण्ड पथकासह गुलाबपुष्प देऊन स्वागत करण्यात आले. विद्यार्थ्यांच्या स्वागतासाठी शाळेच्या आवारात रांगोळी काढून, फुग्यांची सजावट करण्यात आली होती.
शाळेच्या पहिल्या दिवशी विद्यार्थ्यांना पाठ्यपुस्तक व गणवेशाचे वाटप करण्यात आले. यावेळी संस्थेचे उपाध्यक्ष विलास पेद्राम, सचिव डॉ.रत्ना बल्लाळ, खजिनदार जयंत रंगा, विश्वस्त राजेंद्र म्याना, मुख्याध्यापक दिपक रामदिन, प्राथमिकचे मुख्याध्यापक श्रीनिवास मुत्त्याल, उपमुख्याध्यापक पांडूरंग गोने, पर्यवेक्षिका सरोजनी रच्चा, ग्रंथपाल विष्णू रंगा आदींसह शालेय शिक्षक व विद्यार्थी उपस्थित होते.
ज्येष्ठ कलाशिक्षक नंदकुमार यन्नम यांनी ऑनलाईन अभासी शिक्षणाकडून प्रत्यक्ष शाळेकडे जाताना विद्यार्थ्यांचे फलकावर रेखाटलेले चित्राने सर्वांचे लक्ष वेधले. प्रास्ताविकात दिपक रामदिन यांनी विद्यार्थ्यांच्या सर्वांगीन विकासासाठी शाळेत राबविण्यात येणार्या विविध उपक्रमाची माहिती दिली.
विलास पेद्राम यांनी शिक्षणाने मनुष्य सुसंस्कृत होऊन त्याची प्रगती होते. परिस्थिती बदलण्याची शक्ती शिक्षणात असून, श्रमिक कष्टकर्यांच्या मुलांनी उच्च शिक्षाणे आपला उत्कर्ष साधण्याचे आवाहन केले.
डॉ.रत्ना बल्लाळ व राजेंद्र म्याना यांनी शाळेच्या व विद्यार्थ्यांच्या सर्वांगीन विकासासाठी सर्व विश्वस्त पाठिशी असून, विद्यार्थ्यांना अद्ययावत शिक्षण देण्यासाठी संस्था प्रयत्नशील असल्याचे स्पष्ट केले. उपमुख्याध्यापक पांडूरंग गोने यांनी नवीन शैक्षणिक वर्षाबाबत विद्यार्थी व पालकांना मार्गदर्शन केले. कार्यक्रम यशस्वी करण्यासाठी संदिप छिंदम, प्रमोद चन्ना, निलेश आनंदास, सुहास बोडखे, अजय न्यालपेल्ली, सरोजनी आतकरे, पुष्पा मॅकल, मथुरा आढाव यांनी परिश्रम घेतले.