शहरात झालेल्या बैठकीत संघटना प्रतिनिधींचा एकजुटीचा नारा
लवकरच राज्यव्यापी अधिवेशन अहमदनगरला घेण्याचा निर्णय
वाजिद शेख अहमदनगर (प्रतिनिधी)- आजी-माजी सैनिक, वीर माता-पिता, पत्नी व त्यांच्या कुटुंबीयांचे प्रश्‍न सोडविण्यासाठी माजी सैनिकांच्या सर्व संघटनांना एकत्र आणण्यासाठी शहरात सर्व पदाधिकार्‍यांच्या उपस्थितीमध्ये बैठक पार पडली. माजी सुभेदार तथा उद्योजक राजेंद्र खंडारे यांच्या अध्यक्षतेखाली झालेल्या या बैठकीत उपस्थित माजी सैनिकांच्या पदाधिकार्‍यांनी महाराष्ट्र माजी सैनिक फेडरेशनच्या माध्यमातून एकवटण्याचा संकल्प केला.
या बैठकीसाठी मेजर तुकाराम डफळ, त्रिदल सैनिक संघटनेचे संस्थापक अध्यक्ष अंकुश खोटे, रक्षक संघटनेचे अध्यक्ष मेजर राजेंद्र पवार, रावसाहेब काळे, सतीश घुमरे, मेजर शिवाजी वेताळ, कायदे सल्लागार अ‍ॅड. महेश शिंदे, पोपट बनकर, नवनाथ भगत, रमेश डिडूळ, गणेश भावे, ज्ञानदेव काकडे, संजय ढाकणे, गोरख काळे, कैलास दोरगे, कैलास पाखरे, चिमाजी खंदारे, गोरख चौधरी, आशुतोष मतकुळे, विनोद आरेकर, संजय फसले, भानुदास तांबे आदी उपस्थित होते.
राजेंद्र खंडारे म्हणाले की, महाराष्ट्रात माजी सैनिकांचे चांगले संघटन असले, तरी ते विविध संघटनांच्या माध्यमातून विभागले गेले आहेत. या संघटनांना एका फेडरेशनच्या माध्यमातून एकत्र आणून आजी-माजी सैनिकांचे प्रश्‍न सोडवून त्यांना राजकीय, सामाजिक व औद्योगिक प्रवाहात आणण्यासाठी व त्यांना सन्मान मिळण्यासाठी प्रयत्न केले जाणार असल्याचे त्यांनी सांगितले. तर महाराष्ट्रात माजी सैनिकांचे एकच फेडरेशन अस्तित्वात आणण्यासाठी सर्व संघटनांचा सहयोग मिळत असल्याचे त्यांनी स्पष्ट केले.
अंकुश खोटे म्हणाले की, सर्व माजी सैनिकांनी एकत्र येण्याचा निश्‍चय केला आहे. आजी-माजी सैनिकांच्या कुटुंबीयांसाठी निस्वार्थपणे फेडरेशनच्या माध्यमातून सेवा दिली जाणार आहे. त्यांना विविध प्रकारची मदत उपलब्ध करून सेवा निवृत्तीनंतर त्यांना व्यवसायात उभे करण्याचे काम देखील केले जाणार आहे. लवकरच सर्व संघटनांना बरोबर घेऊन शहरात माजी सैनिकांचा मेळावा घेण्यात येणार असून, यामध्ये राज्य कार्यकारणी जाहीर केली जाणार असल्याचे सुतोवाच त्यांनी केले.
रावसाहेब काळे म्हणाले की, सर्व माजी सैनिक एकाच व्यासपीठावर आल्यास त्यांचे प्रश्‍न सुटणार आहे. बेरोजगारी संपविण्यासाठी माजी सैनिकांच्या माध्यमातून उद्योग व्यवसाय देखील निर्माण केले जाणार आहेत. राजकारणात माजी सैनिकांना आरक्षण मिळण्याची मागणी लावून धरली जाणार आहे. शिक्षक मतदारसंघाप्रमाणे सैनिक मतदार संघ निर्माण करण्याची व विविध राजकीय निवडणुकीत माजी सैनिकांना आरक्षण देण्यासाठी शासनस्तरावर पाठपुरावा केला जाणार असल्याचे त्यांनी सांगितले. या बैठकीसाठी अहमदनगर, छत्रपती संभाजीनगर, पुणे, बीड आदी जिल्ह्यातील माजी सैनिकांच्या संघटनांचे प्रतिनिधी उपस्थित होते.