स्थानिक नागरिकांचे शहर वाहतुक शाखेला निवेदन
वाहतूक कोंडी व लहान-मोठ्या अपघातांचा नागरिकांना त्रास
अहमदनगर (प्रतिनिधी)- कोठला येथील राज चेंबर्स समोर भर चौकात व रस्त्यावर थांबणार्‍या खासगी लक्झरी बसमुळे वाहतुक कोंडीचा त्रास नागरिकांना सहन करावा लागत आहे. तर अपघाताला निमंत्रण मिळत असून, कोठला येथे थांबणार्‍या खासगी लक्झरी बसवर कारवाई करण्याची मागणी स्थानिक नागरिकांनी शहर वाहतुक शाखेचे सहा. पोलीस निरीक्षक कैलास वाघ यांच्याकडे निवेदनाद्वारे केली आहे.
यावेळी अन्सार सय्यद, सुनील वाघमारे, अशपाक महागामी, इरफान सय्यद, रियान तांबटकर, माबुद खान, अब्बास शेख, जावेद तांबटकर, साहिल शेख, तोहिद शेख, अमन सय्यद, जहीर शेख, मोईन खाटीक, अर्श शेख आदी उपस्थित होते.
कोठला स्टॅन्ड जवळील राज चेंबर्स येथील ट्रॅव्हल्स ऑफिस समोर भर चौकात मुख्य रस्त्यावर खाजगी लक्झरी बसेस बेकायदेशीरपणे उभ्या केल्या जातात. तसेच बसच्या डिक्कीमध्ये आणलेला माल देखील रस्त्यावरच उतरविला जात आहे. शहरातील उड्डाणपूल ज्या ठिकाणी संपतो अशा सरोष बाग येथे डीएसपी चौकाकडे जाणार्‍या ठिकाणी उतार असल्यामुळे वाहने भरधाव वेगाने येतात.
कोठला येथे मोठा चौक असल्याने वाहनांची मोठी वर्दळ असते. वरदळीच्या वेळेत या खासगी लक्झरी चौकात थांबत असल्याने वाहतुकीला मोठा अडथळा निर्माण होत आहे. या परिसरात अनेक लहान-मोठे अपघात घडत आहेत. तर वाहतूक कोंडी देखील होत असल्याने नागरिकांना व वाहन चालकांना मोठा त्रास सहन करावा लागत असल्याचे निवेदनात म्हंटले आहे.
काही लक्झरी बसेस तर चुकीच्या दिशेने उभे असतात. या उभ्या असलेल्या खासगी बसमुळे भविष्यात एखादा मोठा अपघात होण्याची शक्यता आहे. यामुळे त्वरीत या प्रश्‍नाकडे लक्ष देऊन कोठला येथील राज चेंबर्स समोर भर चौकात व रस्त्यावर थांबणार्‍या खासगी लक्झरी बस वर कारवाई करावी, सदर ठिकाणी लक्झरी बसला थांबण्यास कायमस्वरूपी मनाई करावी व त्यांना शहराबाहेर थांबा देण्याची मागणी स्थानिक नागरिकांनी केली आहे.