उमेदवारांच्या प्रचारासाठी सक्रिय सहभाग घेणार; पक्षाच्या जिल्हा कार्यकारिणी बैठकीत निर्णय
शेतकरी कामगार, कष्टकरी व सर्वसामान्य जनतेवर अन्याय करणारे महायुतीचे सरकार घालवा -कॉ. सुभाष लांडे
नगर (प्रतिनिधी)- राज्यात शेतकरी, युवक, कामगार व शैक्षणिक क्षेत्रात निर्माण झालेले गंभीर प्रश्‍न व मोठ्या प्रमाणात फोफावलेली असहिष्णुतेच्या विरोधात आवाज उठवून भारतीय कम्युनिस्ट पक्षाने सातत्याने आंदोलन करुन नागरिकांमध्ये जागृती केली. या विधानसभा निवडणुकीत महाविकास आघाडी बरोबर असलेले भाकप जिल्ह्यातील सर्व महाविकास आघाडीच्या उमेदवारांचे काम करण्याचा निर्धार शहरात झालेल्या कार्यकारिणीच्या बैठकीत घेण्यात आला.
सोमवारी (दि.4 नोव्हेंबर) शहरातील भारतीय कम्युनिस्ट पक्षाच्या बुरुडगाव रोड येथील पक्ष कार्यालयात बैठक पार पडली. भाकपचे ज्येष्ठ नेते कॉ. कारभारी उगले यांच्या अध्यक्षतेखाली झालेल्या बैठकीला पक्षाचे राज्य सचिव कॉ. ॲड सुभाष लांडे, जिल्हा सेक्रेटरी कॉ. ॲड. बन्सी सातपुते, सहसेक्रेटरी कॉ. ॲड. सुधीर टोकेकर, कॉ. संतोष खोडदे, आप्पासाहेब वाबळे, लक्ष्मण नवले, कॉ. बाबा अरगडे, ॲड. ज्ञानदेव साहाने, सुरेश पानसरे, पांडुरंग शिंदे, श्रीधर आदिक, विलास नवले, धोंडीभाऊ सातपुते, प्रताप साहाने, भारती न्यालपेल्ली, सुलाबाई आदमाने, निवृत्ती दातीर, भारत अरगडे, संगीता कोंडा, येल्लुबा नवले, नारायण नेमाने आदी प्रमुख उपस्थित होते.
या बैठकीत जिल्ह्यातील पाटपाणी, शेतकऱ्यांचा हमी भावाचा प्रश्‍न, ऊस, कापूस, सोयाबीन, गहू, ज्वारी, बाजरी, तूर यांसारख्या पिकांना हमी भाव, मोफत वीज, कामगारांचे किमान वेतन, विद्यार्थी युवकांचे शिक्षण व नोकरी आदी मागण्यांसाठी महाविकास आघाडी सरकारकडून सोडवून घेण्यासाठी जिल्ह्यातील महाविकास आघाडीच्या सर्व उमेदवारांना तन, मन, धनाने सहकार्य करण्याचा निर्णय घेण्यात आला आहे. तर पक्षाच्या किसान सभा, आयटक कामगार संघटना, ऑल इंडिया स्टुडंट्स फेडरेशन, ऑल इंडिया युथ फेडरेशन, भारतीय महिला फेडरेशन, लाल बावटा शेतमजूर युनियन तसेच सांस्कृतिक आघाडीच्या माध्यमातून महाविकास आघाडीला मदत करण्याचे आवाहन करण्यात आले आहे.
कॉ. ॲड सुभाष लांडे म्हणाले की, महाराष्ट्रातील महायुतीचे सरकार हे राजकीय जुमलेबाजी करून सत्तेवर आलेले सरकार असून, जनतेची दिशाभूल आणि फसवणूक करीत आहे. दलीत आदिवासी विद्यार्थ्यांच्या कल्याणकारी निधीवर डल्ला मारत आहे. अनैतिक व भ्रष्ट मार्गाने सत्तेवर आलेल्या अभद्र महायुतीला सत्तेवरून पायउतार करण्यासाठी सर्वांनी महाविकास आघाडीच्या बाजूने उभे रहावे. शेतकरी कामगार, कष्टकरी व सर्वसामान्य जनतेवर अन्याय करणारे महायुतीचे सरकार घालवून त्याजागी महाविकास आघाडीचे सरकार स्थापन करण्यासाठी भारतीय कम्युनिस्ट पक्ष कटिबद्ध असल्याचे त्यांनी सांगितले.
कॉ. ॲड. बन्सी सातपुते म्हणाले की, ही विधानसभेची निवडणूक दलीत, आदिवासी, शेतकरी, कामगार विद्यार्थी युवक यांचे भवितव्य ठरवणारी निवडणूक असल्याने या सर्व समाज घटकांच्या उज्वल भविष्यासाठी महाविकास आघाडीचे सरकार सत्तेवर आणण्यासाठी भारतीय कम्युनिस्ट पक्ष कसोशीने प्रयत्न करणार आहे. सर्व पदाधिकारी व कार्यकर्ते पक्षाचा आदेश पाळणार असून, पक्षाचा आदेश व शिस्तीचा भंग केल्यास त्या पदाधिकाऱ्यावर हकालपट्टीची कारवाई केली जाणार असल्याचा इशारा त्यांनी दिला.