• Sat. Nov 29th, 2025

सावेडीत फुटबॉल स्पर्धा उत्साहात पार

ByMirror

Oct 3, 2023

अडॅप्ट फुटबॉल अकॅडमी व एटी फाऊंडेशनचा उपक्रम, 32 संघांचे रंगतदार सामने

फिरोदिया शिवाजीयन्स, अडॅप्ट, यूथ स्पोर्ट्स व नमोहा फुटबॉल संघ विजयी

अहमदनगर (प्रतिनिधी)- शालेय मुलांमध्ये फुटबॉल खेळाची आवड निर्माण होण्याच्या उद्देशाने सावेडी उपनगरात अडॅप्ट फुटबॉल अकॅडमी व एटी फाऊंडेशनच्या वतीने घेण्यात आलेली फुटबॉल स्पर्धा उत्साहात पार पडली. यामध्ये 9, 11, 13 व 15 वय वर्ष गटातील 32 संघांचा उत्स्फूर्त सहभाग लाभला.


सावेडी येथील अल्फा स्पोर्टस टर्फच्या मैदानावर या स्पर्धेचा थरार रंगला होता. 6-अ-साइड पध्दतीने स्पर्धा खेळविण्यात आली. तर सुरुवातीचे सामने लीग पद्धतीने झाले. विविध गटातील अंतिम सामन्यानंतर पाहुण्यांच्या हस्ते विजेत्या संघांना व उत्कृष्ट खेळाडूंना बक्षीसे देण्यात आली. यावेळी खेळाडू, प्रशिक्षक व पालक मोठ्या संख्येने उपस्थित होते.


अकॅडमी आणि फाऊंडेशन च्या संस्थापिका अंजू तुरंबेकर व अहमदनगर शाखा प्रमुख पल्लवी सैंदाणे यांच्या मार्गदर्शनाखाली या स्पर्धा पार पडल्या. तुरंबेकर म्हणाल्या की, शहरात फुटबॉल खेळ रुजत असून, अनेक चांगले खेळाडू पुढे येत आहे. शहरात फुटबॉल चळवळ वाढविण्याचे कार्य अकॅडमीच्या माध्यमातून सुरु आहे. मोबाईलमध्ये अडकलेली मुले मैदानात येण्यासाठी व फुटबॉल खेळाला चालना देण्यासाठीचा हा उपक्रम राबविण्यात आल्याचे स्पष्ट करुन त्यांनी विजेत्या संघांना शुभेच्छा दिल्या.
विजेत्या, उपविजेत्या आणि उत्कृष्ट खेळाडूंना अजिंक्य बोरकर, सूरज शिंदे, किरण भारस्कर, जगदीप मक्कर व अमित वाघमारे यांच्या हस्ते सन्मानचिन्ह आणि मेडल्स देऊन गौरविण्यात आले. ही स्पर्धा अहमदनगर जिल्हा फुटबॉल असोसिएशनचे अध्यक्ष नरेंद्र फिरोदिया आणि फिरोदिया शिवाजीयन्सचे मनोज वालवेकर यांच्या विशेष सहकार्यातून पार पडली. स्पर्धेचे पंच म्हणून भाग्यश्री थोरात, सुमित सिंह, आणि प्रभू ॲब्राहिम यांनी काम पाहिले. स्पर्धा यशस्वी करण्यासाठी अकॅडमीचे प्रशिक्षक अभिषेक सोनावणे, अक्षय बोराडे, अकॅडमीच्या मुख्य प्रशिक्षिका भक्ती पवार यांनी परिश्रम घेतले.



या स्पर्धेतील विजयी व उपविजयी संघ पुढीलप्रमाणे:-
9 वर्ष वयोगट विजयी- फिरोदिया शिवाजीयन्स फुटबॉल अकॅडमी, उपविजयी- फ्रेंड्स फुटबॉल अकॅडमी,
11 वर्ष वयोगट विजयी- अडॅप्ट फुटबॉल अकॅडमी (केडगाव), उपविजयी- यूथ स्पोर्ट्स अकॅडमी,
13 वर्ष वयोगट विजयी- यूथ स्पोर्ट्स अकॅडमी, उपविजयी- गुलमोहोर स्पोर्ट्स क्लब,
15 वर्ष वयोगट विजयी- नमोहा फुटबॉल क्लब, उपविजयी- गुलमोहर स्पोर्टस्‌ क्लब.

स्पर्धेतील सर्व गटातील उत्कृष्ट खेळाडू
बेस्ट प्लेयर- रंजन वाघमारे, नाविल दिवानी, विराज दिघे, वंश छल्लाणी.
बेस्ट गोलकीपर- भव्यम नवलानी, जीवन जाधव, दक्ष्या कुलकर्णी, झैद शेख.
टॉप स्कोरर- श्‍लोक अधिकार, विरेन सोलात, सोहेल खान, आदित्य गुगळे.

Leave a Reply

Your email address will not be published. Required fields are marked *