बुधवारी होणार शहराचा स्थापना दिवस साजरा

शहराचे संस्थापक अहमद निजामशहा यांच्या कबरीवर चादर अर्पणाचा कार्यक्रम

नगरकरांना उपस्थित राहण्याचे आवाहन

नगर (प्रतिनिधी)- ऐतिहासिक अहमदनगर शहराच्या 535 व्या स्थापना दिनानिमित्त बुधवारी (दि.28 मे) सकाळी 9 वाजता शहराचे संस्थापक अहमद निजामशहा यांच्या बागरोजा येथील कबरीवर नगरकरांच्या वतीने चादर अर्पण कार्यक्रमाचे आयोजन करण्यात आले आहे.

हाजी अजीजभाई चष्मावाला सामाजिक प्रतिष्ठान, मखदूम एज्युकेशन ॲण्ड वेल्फेअर सोसायटी, रहेमत सुलतान फाउंडेशन व अहमदनगर इतिहासप्रेमी मंडळाच्या संयुक्त विद्यमाने या कार्यक्रमाचे आयोजन करण्यात आले आहे.
या कार्यक्रमासाठी सर्व नगरकरांना उपस्थित राहण्याचे आवाहन हाजी अजीजभाई चष्मावाला प्रतिष्ठानचे हाजी मन्सूरभाई शेख, मखदूम सोसायटीचे अध्यक्ष आबीद दुलेखान, रहमत सुलतान फाउंडेशनचे अध्यक्ष युनुसभाई तांबटकर, अहमदनगर इतिहासप्रेमी मंडळाचे अभिजीत वाघ व भैरवनाथ वाकळे यांनी केले आहे.

शहराच्या वैभवशाली इतिहास जाणून घेण्यासाठी व शहर वसविणाऱ्या राजाची कृतज्ञता व्यक्त करण्यासाठी या कार्यक्रमाचे आयोजन करण्यात आले आहे. जगात फार कमी शहरे अशी आहे, ज्यांचा स्थापना दिवस माहिती आहे, त्यापैकी एक अहमदनगर शहर असून, संस्थापक अहमद निजाम शहा यांनी 28 मे 1490 रोजी वसविले. दरवर्षी शहराच्या स्थापना दिनानिमित्त हा उपक्रम राबविण्यात येत असतो. प्रमुख मान्यवरांच्या उपस्थितीमध्ये हा कार्यक्रम होणार आहे. या कार्यक्रमात शहराच्या ऐतिहासिक आठवणींना उजाळा दिला जाणार आहे.