स्नेहालयात रंगली राज्यस्तरीय अबॅकस स्पर्धा
चॅम्पियन्स ठरलेल्या विजेत्यांचा गौरव
नगर (प्रतिनिधी)- एमआयडीसी येथील स्नेहालयात युनिव्हर्सल अबॅकस ॲण्ड वैदिक मॅथ्स असोसिएशनच्या वतीने घेण्यात आलेली राज्यस्तरीय अबॅकस स्पर्धा उत्साहात पार पडली. या स्पर्धेत विविध जिल्ह्यातील विद्यार्थ्यांनी उत्स्फूर्त सहभाग नोंदवला. सकाळच्या सत्रात घेण्यात आलेल्या परीक्षेमध्ये विद्यार्थ्यांनी मोठमोठी गणिते झटपटपणे सोडवित अवघ्या 5 मिनीटाच्या आतमध्ये आपला पेपर सोडवित उपस्थितांना अवाक केले.
ही स्पर्धा ज्युनिअर, मास्टर ज्युनिअर, लेवल 1 ते 5 व वैदिक मॅथ्स या गटात घेण्यात आली. 5 मिनीटाच्या राऊंडमध्ये अवघड गणिती प्रक्रियेचे पेपर विद्यार्थ्यांनी अत्यंत जलदगतीने सोडविली. यामध्ये अहिल्यानगर, अकोला, काष्टी, बीड, श्रीरामपूर आदी विविध जिल्ह्यातून पाचशेपेक्षा अधिक विद्यार्थी सहभागी झाले होते.
स्पर्धेनंतर झालेल्या पारितोषिक वितरण सोहळ्याप्रसंगी प्रमुख पाहुणे माजी महापौर अभिषेक कळमकर, राष्ट्रवादीचे माजी शहर जिल्हाध्यक्ष प्रा. माणिक विधाते, माजी नगरसेविका दिपाली बारस्कर, माजी नगरसेवक डॉ. सागर बोरुडे, अनिल गावडे, डॉ. शजाउद्दीन सय्यद, प्राचार्या स्टीफन डिसोजा, असोसिएशनचे अध्यक्षा हेमलता काळाणे, सुनिल काळाणे, सुरेश बनसोडे, सागर गुंजाळ, अंकुश मोहिते, वैभव ढाकणे, बालीशेठ बांगरे आदींसह विद्यार्थी, शिक्षक व पालक मोठ्या संख्येने उपस्थित होते.
पाहुण्यांचे स्वागत सुनिल काळाणे यांनी केले. प्रास्ताविकात हेमलता काळाणे यांनी कुशाग्र बुध्दीमत्तेसाठी दोन्ही मेंदू कार्यरत असणे आवश्‍यक असते. अबॅकसने बौद्धिक विकासाला चालना मिळून दोन्ही मेंदू कार्यरत होतात. यामुळे विद्यार्थ्यांची एकाग्रता वाढते. स्पर्धा परीक्षांसाठी विद्यार्थ्यांसाठी अबॅकस व वैदिक मॅथ्स उपयुक्त ठरत असल्याचे त्यांनी सांगितले.
अभिषेक कळमकर म्हणाले की, स्पर्धेत टिकण्यासाठी गुणवत्ता आवश्‍यक आहे. तर गुणवत्तेसाठी अबॅकस आवश्‍यक झाले आहे. अबॅकसने बौद्धिक क्षमता वाढते व मेंदूला चालना मिळते. एआयने शिक्षण क्षेत्रात झपाट्याने बदल होत आहे, बदलत्या तंत्रज्ञानाचा उपयोग करून शिक्षण क्षेत्रात पुढे जावे लागणार आहे. पालकांनी मुलांना वेळ देणे गरजेचे आहे. कम्युनिकेशन गॅपमुळे अनेक प्रश्‍न निर्माण होतात. मुलांचे भविष्य घडविण्याअगोदर त्यांचे चांगले मित्र बनण्याचे त्यांनी आवाहन केले.
प्रा. माणिक विधाते म्हणाले की, विद्यार्थ्यांची बौध्दिक क्षमता वाढविण्यासाठी अबॅकस उपयुक्त ठरत आहे. शिक्षण व संस्कारातून सशक्त पिढी घडणार आहे. समाजाचा पाया भक्कम करण्यासाठी सुसंस्कारी पिढी निर्माण करण्याचे काम शिक्षक वर्ग करत आहे. शिक्षण क्षेत्रात काम करताना विद्यार्थी घडविल्याचा प्रत्येक शिक्षकाला अभिमान असतो. घडलेले विद्यार्थी हेच शिक्षकांचे भूषण ठरत असल्याचे त्यांनी सांगितले.
दिपाली बारस्कर म्हणाल्या की, युनिव्हर्सल अबॅकसच्या माध्यमातून संपूर्ण जिल्ह्यात अबॅकसची चळवळ रुजली आहे. ग्रामीण भागातील विद्यार्थ्यांना देखील अबॅकसचे शिक्षण सहजपणे मिळत आहे. चांगल्या शिक्षकांच्या हातात मुले दिल्यास ते उत्तमपणे घडतात. युनिव्हर्सलमध्ये शिक्षकांची चांगली टीम तयार करून विद्यार्थी घडविण्याचे कार्य सुरु आहे. विद्या हे सर्वश्रेष्ठ दान असून, त्याने संपूर्ण आयुष्यभराचे कल्याण होत असल्याचे त्यांनी सांगितले. डॉ. सागर बोरुडे यांनी अबॅकसने विद्यार्थ्यांची एकाग्रता वाढते. अबॅकस फक्त गणित प्रक्रियेपुरता मर्यादीत नसून, त्याचा परिणाम संपूर्ण बौध्दिक क्षमतेवर होत असल्याचे स्पष्ट केले.
या स्पर्धेत आयुषी राठोड (ज्युनिअर लेवल), आयांश गोयल (मास्टर ज्युनिअर), गौरी खेतमाळीस (लेवल 1), आर्या जायभाय (लेवल 2), अबोली पाचपुते, कियान खत्री (लेवल 3) व उत्कर्ष वाघुले (खुला गट) यांनी चॅम्पियन्स ट्रॉफी पटकाविली. सर्व गटातील पहिल्या पाच क्रमांकाच्या विजेत्यांना आकर्षक ट्रॉफीसह बक्षीसे देण्यात आले. तर सहभागी सर्व स्पर्धकांना प्रमाणपत्र व स्मृतीचिन्ह देऊन सत्कार करण्यात आला. तसेच गुणवंत विद्यार्थ्यांसह त्यांना मार्गदर्शन करणाऱ्या शिक्षकांचा देखील सन्मान करण्यात आला. कार्यक्रमाचे सूत्रसंचालन ऋग्वेदी काकडे यांनी केले. स्पर्धा यशस्वी करण्यासाठी युनिव्हर्सल अबॅकस असोसिएशनचे सर्व सदस्य, तसेच विशाल आढाव, बाबासाहेब दहातोंडे, रमेश रनसिंग, रोहित आदलिंगे व राजेश गांगर्डे यांनी परिश्रम घेतले.