मराठी पत्रकार परिषद व डिजीटल मीडिया परिषदच्या वतीने
जागतिक छायाचित्रण दिनानिमित्त वृत्त छायाचित्रकार, माध्यमांचे प्रतिनिधी व कॅमेरामनचा सत्कार
अहमदनगर (प्रतिनिधी)- मोबाईल फोटोग्राफीने छायाचित्रण क्षेत्र कवेत घेतले असले, तरी मूळ छायाचित्रकारांचे महत्त्व कमी झालेले नाही. आजही चांगल्या छायाचित्रकारांना मागणी आहे व त्यांच्या कामाची देखील दखल घेतली जाते. छायाचित्रण कलेला शेवट नाही. बदलत्या काळात याची व्याप्ती अधिक वाढत चालली असल्याचे प्रतिपादन महाराष्ट्र शासनाच्या नाशिक विभागीय पत्रकार अधिस्वीकृती समितीचे सदस्य तथा वरिष्ठ पत्रकार विजयसिंह होलम यांनी केले.
मराठी पत्रकार परिषद व डिजीटल मीडिया परिषदच्या वतीने जागतिक छायाचित्रण दिनानिमित्त वृत्त छायाचित्रकार, माध्यमांचे प्रतिनिधी व कॅमेरामनचा सत्कार करण्यात आला. याप्रसंगी होलम बोलत होते. यावेळी मराठी पत्रकार परिषद राज्याचे सरचिटणीस मन्सूर शेख, जिल्हाध्यक्ष सुर्यकांत नेटके, ज्येष्ठ वृत्त छायाचित्रकार राजू शेख, इलेक्ट्रॉनिक मीडियाचे सुशील थोरात, डिजीटल मीडियाचे आफताब शेख आदींसह पत्रकार, वृत्त छायाचित्रकार, माध्यमांचे प्रतिनिधी व कॅमेरामन मोठ्या संख्येने उपस्थित होते.
पुढे होलम म्हणाले की, जगात छायाचित्र तंत्रज्ञान सर्व क्षेत्रात उपयुक्त ठरत आहे. पूर्वीचा काळ हा फोटो मिळवण्यासाठी मोठा संघर्षाचा होता. आज तंत्रज्ञान विकसित झाले असले तरी, बोलक्या छायाचित्रासाठी कौशल्य पणाला लावून वृत्त छायाचित्रकार नेमका क्षण टिपत असतात. शहरातील छायाचित्रकारांनी अनेक आव्हाने, बदल स्वीकारून तंत्रज्ञान अवगत केले. हा कलेचा वारसा पुढील पिढीला देण्याचे त्यांनी आवाहन केले.
प्रारंभी वृत्तछायाचित्रकार स्व. जितेंद्र अग्रवाल यांना श्रद्धांजली वाहण्यात आली. यावेळी ज्येष्ठ वृत्तछायाचित्रकार दत्ता इंगळे, देवीप्रसाद अय्यंगार, अनिल शहा, समीर मन्यार, बबलू शेख, नासीर पठाण, राजू खरपुडे, लहू दळवी, वाजिद शेख, साजिद शेख, मोहसीन खान, प्रदीप पेंढारे, उदय जोशी, श्रीकांत वंगारी, अझर सय्यद, मोहसीन सय्यद, शब्बीर सय्यद, अनिकेत गवळी, सचिन शिंदे, शफी सय्यद, विक्रम लोखंडे, शुभम पाचरणे, मुंतजीर शेख, अकिस सय्यद, आयनुल शेख, विनायक मिसाळ यांचा सत्कार करण्यात आला.
दत्ता इंगळे यांनी छायाचित्रकार संघटनेच्या माध्यमातून भरविण्यात येणाऱ्या छायाचित्र प्रदर्शन व जुन्या काळातील छायाचित्रण कलेच्या आठवणींना उजाळा दिला. कार्यक्रमाचे सूत्रसंचालन मंजू भागानगरे यांनी केले. आभार आफताब शेख यांनी मानले.