मासूम संस्थेच्या फिरत्या संगणक लॅबद्वारे विद्यार्थ्यांनी घेतले संगणकाचे निशुल्क प्रशिक्षण
अहमदनगर (प्रतिनिधी)- शहरात दिवसा काम करुन रात्र शाळेत शिक्षण घेणाऱ्या विद्यार्थ्यांना ज्युनिअर कॉलेज भाई सथ्था नाईट हायस्कूलच्या माध्यमातून घरापर्यंत जावून शहरातील विविध ठिकाणी मासूम संस्थेच्या मुंबई येथून आलेल्या फिरत्या संगणक लॅबद्वारे (डिजीटल बस) संगणकाचे मोफत प्रशिक्षण देण्यात आले. प्रशिक्षण पूर्ण केलेल्या युवक-युवतींना सारडा महाविद्यालयाच्या सभागृहात प्रमाणपत्राचे वितरण करण्यात आले.
हिंद सेवा मंडळाचे अध्यक्ष शिरीष मोडक यांच्या अध्यक्षतेखाली झालेल्या संगणक प्रशिक्षण प्रमाणपत्र वितरण सोहळ्याप्रसंगी सचिव संजय जोशी, कार्याध्यक्ष अनंत फडणीस,ज्येष्ठ मार्गदर्शक अजित बोरा,सुमतीलाल कोठारी, उपकार्याध्यक्ष जगदीश झालानी, सहसचिव ज्योती कुलकर्णी, रात्रशाळेचे चेअरमन डॉ. पारस कोठारी, रणजीत श्रीगोड, विठ्ठल उरमुडे, कल्याण लकडे, गिरीश पाखरे, योगेश देशमुख, बाळासाहेब कुलकर्णी, नाईट स्कूलचे प्राचार्य सुनिल सुसरे, सारडा महाविद्यालयाच्या प्राचार्या माहेश्‍वरी गावीत, अधिक्षक अशोक असेरी आदींसह नाईट स्कूलचे सर्व शिक्षक-शिक्षकेत्तर कर्मचारी उपस्थित होते.
डॉ. पारस कोठारी म्हणाले, काळाची गरज ओळखून नाईट स्कूलच्या विद्यार्थ्यांसाठी संगणक प्रशिक्षणाचे आयोजन करण्यात आले होते. विविध भागात राहणाऱ्या विद्यार्थ्यांना सकाळी घरी जावून संगणक प्रशिक्षण देण्यात आले. दोन महिन्यात 44 विद्यार्थ्यांनी यशस्वीरित्या संगणक प्रशिक्षण यशस्वीरित्या पूर्ण केले. कबाडकष्ट करुन शिक्षण घेणाऱ्या विद्यार्थ्यांना भविष्यात उपयोगी पडणारे हे प्रशिक्षण होते. अशा पध्दतीने कायमस्वरुपी संगणक प्रशिक्षण वर्ग चालविण्यासाठी मासूम संस्थेने एक डिजीटल बस नाईट स्कूलसाठी देण्याचे कबूल केले असल्याचे त्यांनी सांगितले.
शिरीष मोडक म्हणाले की, संगणकीय युगात संगणक ज्ञान महत्त्वाचे बनले आहे. संगणक प्रशिक्षणाचे प्रमाणपत्र जवळ असल्यास नोकरीसाठी त्याचा फायदा होणार आहे. संगणक प्रशिक्षणाची फी व वेळ नाईट स्कूलच्या विद्यार्थ्यांना परवडत नाही. निशुल्क प्रशिक्षण व विद्यार्थ्यांच्या सोयीनूसार वेळ उपलब्ध होत असल्याने विद्यार्थ्यांना हे प्रशिक्षण पूर्ण करता आले असल्याचे त्यांनी सांगितले.
पाहुण्यांचे स्वागत प्राचार्य सुनिल सुसरे यांनी केले. मासूम संस्थेच्या संचालिका निकिता केतकर, वरिष्ठ व्यवस्थापक गुरुप्रसाद पाटील, विभाग प्रमुख शशिकांत गवस, कार्यक्रम प्रमुख संदीप सुर्यवंशी, वरिष्ठ कार्यक्रम प्रमुख कमलाकर माने व कार्यक्रम व्यवस्थापक अशोक चिंधे यांच्या मार्गदर्शनाखाली शहरातील भाई सथ्था नाईट हायस्कूल व रामकरण सारडा विद्यार्थी गृहातील विद्यार्थ्यांना मासूम संस्थेने एलकेम (ब्लू स्टार कंपनी) यांच्या सहकार्याने निशुल्क बेसिक संगणक प्रशिक्षण देण्यात आले. सकाळी विद्यार्थी राहत असलेल्या भागात जाऊन तर संध्याकाळी शाळेच्या प्रांगणात विद्यार्थ्यांना संगणक प्रशिक्षण देण्यात आले होते.शैक्षणिक सुविधा, प्रोजेक्टर, 14 संगणक संचासह एकाच वेळी 28 विद्यार्थी बसण्याची क्षमता असलेल्या वातानुकूलित डिजिटल बसमध्ये 44 विद्यार्थ्यांनी प्रशिक्षण यशस्वीपणे पूर्ण केले. कार्यक्रमाचे सूत्रसंचालन शरद पवार यांनी केले. आभार सुनिल सुसरे यांनी मानले.